ජාත්‍යන්තර සිසුන්ගේ ප්‍රමුඛතම අධ්‍යාපනික ගමනාන්තයක් ලෙස දිගු කාලයක් පැවති ඔස්ට්‍රේලියාවේ ආකර්ෂණය සැලකිය යුතු ලෙස පහළ ගොස් ඇති බව IDP Education ආයතනයේ නවතම සමීක්ෂණ වාර්තාවකින් හෙළි වී තිබෙනවා.

එම වාර්තාවට අනුව, අනාගත ජාත්‍යන්තර සිසුන් අතරින් ඔස්ට්‍රේලියාව තම පළමු අධ්‍යාපනික තේරීම ලෙස නම් කර ඇත්තේ 24%ක් පමණයි. කෙසේ වෙතත්, මීට මාස හයකට පෙර එම අගය 31%ක් ලෙසයි පැවතී තිබුණේ. එනම්, මාස හයක් ඇතුළත ඔස්ට්‍රේලියාවට ඇති පළමු තේරීමේ කැමැත්ත 7%කින් පහළ ගොස් තිබෙනවා.

ඔස්ට්‍රේලියාවට ඇති ආකර්ෂණය අඩුවෙද්දී, ඇමරිකාව සහ බ්‍රිතාන්‍යය වෙත ඇති කැමැත්ත ඉහළ ගොස් ඇති බවටයි එම සමීක්ෂණ වාර්තාවේ සදහන් වන්නේ. 

නව සමීක්ෂණයට අනුව ඇමරිකාව සහ බ්‍රිතාන්‍යය යන රටවල් දෙකම 21% බැගින් ලබාගෙන තිබෙනවා.

කැනඩාව ද ජාත්‍යන්තර සිසුන්ගේ ප්‍රධාන තේරීම් අතර වන බවයි වාර්තා වන්නේ.

කෙසේ වෙතත්, ඔස්ට්‍රේලියාව තවමත් සිසුන් වැඩිම පිරිසක් සලකා බලන අධ්‍යාපනික ගමනාන්තය වීම විශේෂත්වයක්.

සමීක්ෂණයට සහභාගී වූ පිරිසෙන් 54%ක් තවමත් ඔස්ට්‍රේලියාව තම අධ්‍යාපනික විකල්පයක් ලෙස සලකා තිබෙනවා.

ඔස්ට්‍රේලියාව කෙරෙහි ජාත්‍යන්තර සිසුන්ගේ ආකර්ෂණය පහළ යාමට; වීසා නීති සහ කොන්දේසි නිතර වෙනස් වීම, වීසා අනුමැතිය ලැබීම පිළිබඳ අවිනිශ්චිතතාව, අධ්‍යාපනික සහ ජීවන වියදම් ඉහළ යාම මෙන්ම අධ්‍යාපනය අවසන් කිරීමෙන් පසු රැකියා ලබාගැනීමට සහ ඔස්ට්‍රේලියාවේ රැඳී සිටීමට ඇති අවස්ථා පිළිබඳ ව ඇති අවිනිශ්චිතතාව වැනි කරුණු බලපා ඇති බවයි වාර්තා වන්නේ. 

විශේෂයෙන්ම, 2026 ජූලි මාසයේදී ශිෂ්‍ය වීසා අයදුම් කිරීමේ ගාස්තුව ඉහළ දැමීමත් සිසුන්ට අමතර මූල්‍ය බරක් වී තිබෙනවා.

උපාධි මට්ටමේ අයදුම්කරුවන් සඳහා එම ගාස්තුව ඔස්ට්‍රේලියානු ඩොලර් 2,500ක් දක්වාත්, පශ්චාත් උපාධි මට්ටමේ අයදුම්කරුවන් සඳහා ඩොලර් 5,750ක් දක්වාත් ඉහළ ගොස් ඇති බව වාර්තා වෙනවා.

2026 ජූනි මාසය වන විට ඔස්ට්‍රේලියාවේ Student Visa ප්‍රතික්ෂේප කිරීමේ අනුපාතය 24.6%ක් දක්වා ඉහළ ගොස් තිබෙනවා. මීට වසර දහයකට පෙර එම අගය පැවතියේ 7.9%ක් ලෙසයි.

තවත් වැදගත් කරුණක් වන්නේ සමීක්ෂණයට සහභාගී වූ අනාගත සහ අයදුම් කළ සිසුන්ගෙන් අඩකටත් වැඩි පිරිසක් තම අධ්‍යාපනික ගමනාන්තය තීරණය කිරීමේදී වීසා අනුමැතිය ලැබීමේ හැකියාව ඉතා වැදගත් සාධකයක් ලෙස සලකා තිබීමයි.

මෙම වාර්තාවෙන් හෙළි වී ඇති තවත් කරුණක් වන්නේ දැනට ඔස්ට්‍රේලියාවේ අධ්‍යාපනය ලබන ජාත්‍යන්තර සිසුන්ටත් අපේක්ෂා කළ තරම් පහසු අත්දැකීමක් නොලැබීමයි.

දැනට සිටින සිසුන්ගෙන් අඩකට ආසන්න පිරිසක් අර්ධකාලීන රැකියා හෝ උපාධියෙන් පසු රැකියා සොයාගැනීම තමන් බලාපොරොත්තු වූවාට වඩා අපහසු වී ඇති බව සඳහන් කර තිබෙනවා.

තවත් තුනෙන් එකකට වැඩි පිරිසක් ජීවන වියදම සම්බන්ධයෙන් දුෂ්කරතාවලට මුහුණ දෙන බවයි වාර්තා වන්නේ.

මෙම සමීක්ෂණය සඳහා රටවල් 106ක සිසුන් 4,834 දෙනෙකුගෙන් ප්‍රතිචාර ලබාගෙන තිබෙන බවයි අදාළ වාර්තාවේ වැඩිදුරටත් සදහන් වී තිබුණේ.