ඔස්ට්‍රේලියාවේ Bondi Beachහි සිදුවූ ත්‍රස්ත ප්‍රහාරයෙන් මාස 11කට ආසන්න කාලයක් ගතවී ඇතත් තමන් තවමත් ශාරීරික හා මානසික වේදනාවෙන් පසුවන බව තුවක්කුකරුවෙකු නිරායුධ කරමින් ජීවිත රැසක් බේරාගත් Ahmed Al Ahmed පවසනවා.

A Current Affair වැඩසටහන සමඟ පැවති සම්මුඛ සාකච්ඡාවකදී ඔහු සඳහන් කළේ, එදින ජීවිත අහිමි වූ පුද්ගලයන් බේරාගැනීමට නොහැකි වීම තමන්ගේ විශාලතම පසුතැවීම බවයි.

2025 දෙසැම්බර් 14 වැනිදා Bondi Beachහි පැවති යුදෙව් ආගමික Hanukkah සැමරුමකට එල්ල වූ ත්‍රස්ත ප්‍රහාරයෙන් පුද්ගලයන් 15 දෙනෙකු ජීවිතක්ෂයට පත්වුණා.

එහිදී තුවක්කුකරුවෙකු වෙත දිවගොස් ඔහු නිරායුධ කළ Ahmed Al Ahmedගේ නිර්භීත ක්‍රියාව ජාත්‍යන්තර අවධානයට ලක්වුණා.

කෙසේ වෙතත් ප්‍රහාරයේදී ඔහුගේ වම් අතට වැදුණු උණ්ඩ දෙකක් තවමත් ශරීරයේ පවතින අතර, අත සහ ඇඟිලි චලනය කිරීමේ අපහසුතා මෙන්ම දැඩි වේදනාවක් ද පවතින බව ඔහු සඳහන් කරනවා.

එමෙන්ම ප්‍රහාරයේ මතකයන් හේතුවෙන් තමන් තවමත් නින්ද නොයෑම සහ බියකරු සිහින දැකීම වැනි ගැටලුවලට මුහුණ දෙන බවයි ඔහු පවසන්නේ.

ඔහුගේ නිර්භීත ක්‍රියාව අගයමින් ලොව පුරා ජනතාව එක්ව Online ඔස්සේ ඔස්ට්‍රේලියානු ඩොලර් මිලියන 2.5ක මුදලක් ද රැස්කර ලබාදී තිබුණා.

කෙසේ වෙතත් ඉන් අනතුරුව පවුලේ සාමාජිකයන් සම්බන්ධ නීතිමය ගැටලු සහ Social Media ඔස්සේ එල්ල වූ අපහාස හේතුවෙන් තමන් දැඩි මානසික පීඩනයකට ලක්වූ බව ද Ahmed අනාවරණය කර තිබෙනවා.

තමන් වීරයෙකු ලෙස ප්‍රසිද්ධියක් ලබාගැනීමට උත්සාහ නොකළ බව පවසන ඔහු, ඔස්ට්‍රේලියානු මුස්ලිම් ජාතිකයෙකු ලෙස එදා ක්‍රියා කළේ සමස්ත ඔස්ට්‍රේලියානු ප්‍රජාව වෙනුවෙන් බව ද අවධාරණය කළා.

ආගමික වෙනස්කම්වලට පෙර සියලු දෙනා මනුෂ්‍යයන් ලෙස එකිනෙකාට සැලකිය යුතු බවයි Ahmed Al Ahmed පවසා ඇත්තේ.