ලොව ප්‍රබලතම AI තාක්ෂණයන් සංවර්ධනය කරන සමාගම් සඳහා අනිවාර්ය ආරක්ෂක නීති හඳුන්වාදීමට ඔස්ට්‍රේලියානු ෆෙඩරල් රජය අද (10) සැලසුම් ප්‍රකාශයට පත් කර තිබෙනවා.
අගමැති Anthony Albanese ප්‍රකාශ කර ඇත්තේ, ඔස්ට්‍රේලියාව තුළ ක්‍රියාත්මක වීමට අපේක්ෂා කරන අතිශය දියුණු AI තාක්ෂණයන් සංවර්ධනය කරන සියලුම සමාගම් සඳහා මෙම නව ආරක්ෂක ප්‍රමිතීන් අනිවාර්ය කිරීමට නියමිත බවයි.

රජයේ විසින් ක්‍රියාත්මක කරන AI in Australia’s Interests වැඩපිළිවෙළ යටතේ, Australian AI Standards නීති රාමුව හරහා මෙම ආරක්ෂක පියවර හඳුන්වාදීමට සැලසුම් කර ඇති අතර, මහජනතාවගේ ආරක්ෂාව තහවුරු කිරීම, ජාතික ආරක්ෂාව සුරක්ෂිත කිරීම සහ AI තාක්ෂණය හරහා ඇතිවිය හැකි බරපතළ අවදානම් අවම කිරීම මෙහි ප්‍රධාන අරමුණ වී තිබෙනවා.

යෝජිත නීති අනුව, AI සමාගම් තම තාක්ෂණය සංවර්ධනය කිරීමේ සිට භාවිතයට නිකුත් කිරීම දක්වා සෑම අදියරකදීම නිසි ආරක්ෂක ක්‍රමවේද පවත්වාගෙන යා යුතු බවයි සදහන්.

එමෙන්ම AI පද්ධතිවලින් ඇතිවිය හැකි බරපතළ අවදානම් හඳුනාගෙන පාලනය කිරීම, ස්වාධීන ආරක්ෂක ඇගයීම් සඳහා අවසර ලබාදීම සහ AI සම්බන්ධ බරපතළ සිදුවීම් පිළිබඳව රජයට කඩිනමින් දැනුම්දීම ද අනිවාර්ය කිරීමට යෝජනා කර තිබෙනවා.

මීට අමතරව, සමාගම් තම ආරක්ෂක ප්‍රතිපත්ති සහ ක්‍රමවේද ප්‍රසිද්ධ කළ යුතු අතර, තාක්ෂණය දියුණු වීමත් සමඟ යාවත්කාලීන වන ආරක්ෂක ප්‍රමිතීන්ට අනුගත වීම ද අවශ්‍ය වනු ඇති බවයි සඳහන් වන්නේ.

මෙම නීති ක්‍රියාත්මක කිරීම අධීක්ෂණය සඳහා AI ආරක්ෂාව පිළිබඳ නව නියාමන ආයතනයක් පිහිටුවීමට ද රජය යෝජනා කර තිබෙනවා.

එම ආයතනය Australian AI Safety Institute සමඟ එක්ව කටයුතු කිරීමට නියමිත අතර, අනිවාර්ය ආරක්ෂක නීති උල්ලංඝනය කරන සමාගම්වලට සැලකිය යුතු දඩ පැනවීමේ බලතල ලබාදීමට ද අපේක්ෂා කෙරෙන බවයි පැවසෙන්නේ.

විශේෂයෙන් මිනිස් පාලනයෙන් බැහැරව ක්‍රියා කළ හැකි AI Agents සහ අතිශය දියුණු AI Models හරහා ඇතිවිය හැකි අවදානම් කල්තියා හඳුනාගැනීමටත්, බරපතළ AI සිදුවීම්වලදී කඩිනමින් සම්බන්ධීකරණය කළ ක්‍රියාමාර්ග ගැනීමටත් මෙම නීති උපකාරී වනු ඇති බව රජය පෙන්වා දෙනවා.

අගමැති Anthony Albanese සඳහන් කර ඇත්තේ, AI තාක්ෂණය සෞඛ්‍ය සේවා, ආර්ථික වර්ධනය සහ ඵලදායිතාව ඉහළ නැංවීමට විශාල අවස්ථා ලබාදුන්නද, එහි වේගවත් දියුණුවත් සමඟ ඇතිවන නව අවදානම්වලට සූදානම් වීම අත්‍යවශ්‍ය වන බවයි.

කෙසේ වෙතත්, මෙම නව ආරක්ෂක නීති තවමත් යෝජිත මට්ටමේ පවතින අතර, නීති සම්පාදනයට අදාළ වැඩිදුර විස්තර සහ ක්‍රියාත්මක වන දිනය ඉදිරියේදී ප්‍රකාශයට පත් කිරීමට නියමිත බවයි අගමැති Albanese වැඩිදුරටත් පවසන්නේ.