ඔස්ට්‍රේලියාවේ Victoria ප්‍රාන්තයේ වසර 100ක් පමණ පැරණි දේවස්ථානයක් ඩොලර් 45,000ක් වැනි අඩු මුදලකට අලෙවි වී තිබෙනවා.

Horsham නගරයට කිලෝමීටර් 80ක් පමණ වයඹ දෙසින් පිහිටි Lorquon ප්‍රදේශයේ මෙම දේවස්ථානය, මුලින් ඩොලර් 65,000කට අලෙවි කිරීමට ඉදිරිපත් කර තිබූ බවයි වාර්තා වන්නේ. කෙසේ වෙතත්, පසුව එහි මිල ඩොලර් 20,000කින් අඩු කර තිබෙනවා.

වර්ග මීටර් 2,025ක භූමියක පිහිටි මෙම පැරණි දේවස්ථානය මිලදී ගැනීමට ඔස්ට්‍රේලියාවේ විවිධ ප්‍රදේශවලින් ඉල්ලුම් ලැබී ඇති අතර, මිලදී ගැනීමේ යෝජනා 10ක් ඉදිරිපත් ව තිබූ බවයි දේපළ වෙළෙඳ නියෝජිත Rachael McCarthy සඳහන් කරන්නේ.

කෙසේ වෙතත්, ගොඩනැගිල්ලේ බිත්තිවල විශාල ඉරිතැලීම්, හානි වූ ගල් බැමි සහ සිවිලිමේ කොටස් කඩා වැටී තිබීම හේතුවෙන් ඇතැම් ගැනුම්කරුවන් ඉවත් වී තිබෙනවා.

අවසානයේ Melbourne නගරයේ ගැනුම්කරුවෙකු මෙම දේවස්ථානය මිලදී ගෙන ඇති අතර, එහි ඓතිහාසික ස්වරූපය ආරක්ෂා කරමින් ප්‍රතිසංස්කරණය කිරීමට සැලසුම් කර ඇති බවයි පැවසෙන්නේ.

කෙසේ වෙතත්, ප්‍රතිසංස්කරණ කටයුතු සඳහා වැයවන මුදල දේවස්ථානය මිලදී ගැනීමට වැය කළ මුදල මෙන් දෙගුණයකටත් වැඩි විය හැකි බවයි ඇස්තමේන්තු කර ඇත්තේ.