ඔස්ට්‍රේලියාවේ අලුතින් ආරම්භ කරන ව්‍යාපාරවලට ද විදේශීය පුහුණු ශ්‍රමිකයන් සඳහා Skills in Demand හෙවත් Subclass 482 වීසා යටතේ Sponsorship ලබාදීමට හැකියාව පවතින බව සංක්‍රමණ නීති විශේෂඥයන් පෙන්වා දෙනවා.

ඊයේ Hannan Tew Immigration Lawyers විසින් ප්‍රකාශයට පත්කළ නව මාර්ගෝපදේශයක සඳහන් වන්නේ, අලුතින් ලියාපදිංචි කළ සමාගම්වලට පවා නියමිත සුදුසුකම් සපුරාලන්නේ නම් Standard Business Sponsorship සඳහා අයදුම් කළ හැකි බවයි.

එමෙන්ම සමාගමක අධ්‍යක්ෂවරයෙකුට හෝ කොටස් හිමියෙකුට තමන්ගේම සමාගම හරහා 482 වීසා සඳහා Sponsorship ලබාගැනීම නීතියෙන් තහනම් කර නොමැති බව ද එහි සඳහන් වනවා.

කෙසේ වෙතත් එවැනි අයදුම්පත් ආගමන බලධාරීන්ගේ දැඩි පරීක්ෂාවට ලක්වන අතර, අදාළ රැකියා තනතුර සැබෑ ව්‍යාපාරික අවශ්‍යතාවක් මත නිර්මාණය වී ඇති බව තහවුරු කළ යුතුයි.

ඒ සඳහා සමාගමේ ව්‍යාපාරික ගනුදෙනු, බැංකු වාර්තා, පාරිභෝගික ගිවිසුම්, සේවක වැටුප් වාර්තා සහ අනාගත මූල්‍ය සැලසුම් ඇතුළු සාක්ෂි ඉදිරිපත් කිරීම වැදගත් වනවා.

මේ අතර 482 482 වීසා අනුග්‍රහය ලබාදීමේදී Sponsorship සහ Nomination සඳහා වැයවන ගාස්තු මෙන්ම Skilling Australians Fund බද්ද සේවකයාගෙන් අයකර ගැනීම නීතියෙන් තහනම් බව ද අවධාරණය කර තිබෙනවා.

2026 ජූලි මාසයේ සිට ප්‍රධාන අයදුම්කරුවෙකුගේ 482 වීසා අයදුම්පත් ගාස්තුව සාමාන්‍යයෙන් ඔස්ට්‍රේලියානු ඩොලර් 4,015ක් වන අතර, එම වීසා අයදුම්පත් ගාස්තුව සේවකයා විසින් ගෙවිය හැකියි.

එමෙන්ම අනුග්‍රහය ලබාදෙන සමාගම් අදාළ සේවකයන්ට නියමිත වැටුප් ගෙවීම, රැකියා කොන්දේසි ආරක්ෂා කිරීම සහ ඇතැම් ව්‍යාපාරික වෙනස්කම් දින 28ක් ඇතුළත ආගමන දෙපාර්තමේන්තුවට දැනුම්දීම ඇතුළු නීතිමය වගකීම් ඉටුකළ යුතු වනවා.

මෙම නීති උල්ලංඝනය කරන ව්‍යාපාරවල Sponsorship අනුමැතිය අවලංගු කිරීමට හෝ ඉදිරියේදී සේවකයන්ට අනුග්‍රහය ලබාදීම තහනම් කිරීමට ද බලධාරීන්ට හැකියාව පවතිනවා.

ඒ අනුව අලුතින් ආරම්භ කරන ව්‍යාපාරවලට 482 වීසා අනුග්‍රහය ලබාදීමට හැකියාව පැවතියත්, සමාගමක් ලියාපදිංචි කිරීම පමණක් වීසා අනුමැතිය ලබාගැනීමට ප්‍රමාණවත් නොවන බවයි සංක්‍රමණ නීති විශේෂඥයන් අවධාරණය කරන්නේ.