ආදර සබඳතා බිඳවැටීමට හෝ නව ආදර සබඳතාවක් ආරම්භ කිරීමට බාධාවක් වීමට පුද්ගලයන්ගේ පෞද්ගලික සනීපාරක්ෂක පුරුදු ප්‍රධාන හේතුවක් විය හැකි බව නව සමීක්ෂණයකින් අනාවරණය වී තිබෙනවා.

ඇමෙරිකාවේ සිදුකළ SCA සමීක්ෂණයකට අනුව, වැඩිහිටියන්ගෙන් සියයට 11ක් පමණ තම සහකරුගේ හෝ සහකාරියගේ දුර්වල සනීපාරක්ෂක පුරුදු හේතුවෙන් ආදර සබඳතා අවසන් කර ඇති බවයි හෙළි වී ඇත්තේ.

විශේෂයෙන්ම මුඛයේ දුර්ගන්ධය, ශරීරයේ දුර්ගන්ධය සහ පෞද්ගලික පිරිසිදුකම පිළිබඳ අවධානය යොමු නොකිරීම ආදර සබඳතාවලට අහිතකර ලෙස බලපාන බව විශේෂඥයන් පෙන්වා දෙනවා.

2018 වසරේ බ්‍රිතාන්‍යයේ සිදුකළ තවත් සමීක්ෂණයකට අනුව, පුද්ගලයන්ගෙන් සියයට 35කට වැඩි පිරිසක් මුඛ දුර්ගන්ධය ආකර්ෂණය අඩුකරන ප්‍රධාන සාධකයක් ලෙස හඳුන්වා තිබෙනවා.

එමෙන්ම වැසිකිළිය භාවිතයෙන් පසු නිසි පරිදි පිරිසිදු නොකිරීම, ශරීරයේ පිරිසිදුකම නොසලකා හැරීම සහ නියපොතු අපිරිසිදුව තබාගැනීම ද ආදර සබඳතාවල ගැටලු ඇති කිරීමට හේතුවිය හැකි බව වාර්තාවේ සඳහන් වනවා.

එකට ජීවත්වන යුවළ අතර පෞද්ගලික පිරිසිදුකම පිළිබඳ නොසැලකිල්ල, අනෙක් පුද්ගලයාට ගරු නොකිරීමක් ලෙස හැඟිය හැකි බවයි සබඳතා පිළිබඳ විශේෂඥයන් පෙන්වා දෙන්නේ.

මේ අතර, ආදර සබඳතාවල සිටින පුද්ගලයන් සම්බන්ධයෙන් සිදුකළ වෙනත් සමීක්ෂණයකදී පස් දෙනෙකුගෙන් එක් අයෙකු අපිරිසිදු නියපොතු දැඩි ලෙස අප්‍රසන්න බව ප්‍රකාශ කර තිබෙනවා.

විශේෂඥයන් පවසන්නේ දිනපතා ස්නානය කිරීම, දත් මැදීම, නියපොතු පිරිසිදුව තබාගැනීම සහ පොදු අවකාශ පිරිසිදුව පවත්වාගැනීම වැනි සරල පුරුදු සෞඛ්‍යයට මෙන්ම සබඳතාවල අන්‍යෝන්‍ය ගෞරවය පවත්වාගැනීමට ද වැදගත් වන බවයි.

කෙසේ වෙතත් සනීපාරක්ෂක පුරුදු සම්බන්ධයෙන් පුද්ගලයන්ගේ අපේක්ෂාවන් වෙනස් විය හැකි අතර, ඒවා ආදර සබඳතා බිඳවැටීමට බලපාන එකම හේතුව නොවන බව ද සඳහන් කළ යුතුයි.