සංචිත බැංකුව විසින් පොලී අනුපාත ඉහළ දැමීමෙන් අනතුරුව ඔස්ට්‍රේලියානු ඩොලරයේ අගය පසුගිය මාර්තු මාසයෙන් පසු වාර්තා වූ පහළම මට්ටමකට ඇද වැටී තිබෙනවා.

පසුගිය සතිය තුළ ඇමෙරිකානු ඩොලරයට සාපේක්ෂව ඔස්ට්‍රේලියානු ඩොලරයේ අගය සියයට 2.3කින් පහත වැටී ඇති අතර, සතිය අවසානයේදී ඔස්ට්‍රේලියානු ඩොලරයක් ඇමෙරිකානු ශත 68.66ක් ලෙස වාර්තා වී තිබුණා.

එය පසුගිය සතියේ ප්‍රධාන ජාත්‍යන්තර මුදල් ඒකක අතරින් දුර්වලම ක්‍රියාකාරීත්වයක් පෙන්නුම් කළ මුදල් ඒකකයක් බවයි ආර්ථික විශ්ලේෂකයන් පෙන්වා දෙන්නේ.

නොවැම්බර් 3 වැනිදා RBA ආයතනය සිය ප්‍රධාන පොලී අනුපාතය සියයට 0.25කින් ඉහළ දමමින් සියයට 4.85 දක්වා වැඩි කිරීමට තීරණය කළා.

සාමාන්‍යයෙන් පොලී අනුපාත ඉහළ යාම මුදල් ඒකකයේ අගය ශක්තිමත් වීමට හේතුවිය හැකි නමුත්, මෙවර ඔස්ට්‍රේලියානු ඩොලරය පහත වැටීම විශේෂත්වයක් වනවා.

CommSec ආයතනයේ වෙළෙඳපොළ විශ්ලේෂක James Gruber පවසන්නේ, පොලී අනුපාත ඉදිරියේදී කෙසේ වෙනස් වේද යන්න පිළිබඳ ආයෝජකයන්ගේ අපේක්ෂා වෙනස් වීම මෙම තත්ත්වයට ප්‍රධාන හේතුවක් බවයි.

විශේෂයෙන්ම ඔස්ට්‍රේලියාවේ පොලී අනුපාත ඉහළ යාම මේ වන විට උපරිම මට්ටමට ළඟා වී ඇති බවට ඇතැම් ආයෝජකයන් විශ්වාස කරන අතර, 2027 දෙසැම්බර් මාසය වන විට පොලී අනුපාත අඩු කිරීමක් සිදුවිය හැකි බවට මූල්‍ය වෙළෙඳපොළ අපේක්ෂා කරනවා.

ඊට වෙනස්ව ඇමෙරිකාවේ පොලී අනුපාත 2027 අප්‍රේල් මාසය වන විට තවදුරටත් ඉහළ යා හැකි බවට වෙළෙඳපොළ තුළ අපේක්ෂා පවතිනවා.

මේ අතර ජාත්‍යන්තර කොටස් වෙළෙඳපොළවල පවතින අවිනිශ්චිතතාව සහ ඇතැම් ප්‍රධාන වෙළෙඳ භාණ්ඩවල මිල පහත වැටීම ද ඔස්ට්‍රේලියානු ඩොලරයට අහිතකර ලෙස බලපා තිබෙනවා.

කෙසේ වෙතත් ඔස්ට්‍රේලියානු ඩොලරයේ අගය තවදුරටත් පහත වැටුණහොත් විදේශ රටවලින් ආනයනය කරන භාණ්ඩ, විදේශ සංචාර සහ ඇමෙරිකානු ඩොලර්වලින් ගෙවීම් සිදුකරන සේවාවල වියදම් ඉහළ යා හැකියි.