මැදපෙරදිග පවතින ආරක්ෂක තත්ත්වය හේතුවෙන් ඔස්ට්රේලියාව සහ ශ්රී ලංකාව අතර ගමන් කරන ගුවන් මගීන්ගේ සංචාරක සැලසුම්වලට හදිසි බලපෑම් එල්ල විය හැකි බව ඔස්ට්රේලියානු රජය අනතුරු අඟවා තිබෙනවා.
ඔස්ට්රේලියානු රජයේ Smartraveller සේවාව පෙන්වා දෙන්නේ, මැදපෙරදිග ගැටුම් හේතුවෙන් ඇතැම් රටවල ගුවන් අවකාශ කෙටි දැනුම්දීමකින් වසා දැමීමටත්, ගුවන් සමාගම්වලට ගමන් වාර සීමා කිරීමට, වෙනත් මාර්ග භාවිත කිරීමට හෝ ගුවන් ගමන් අවලංගු කිරීමටත් සිදුවිය හැකි බවයි.
මෙම තත්ත්වය විශේෂයෙන් Dubai, Doha, Abu Dhabi ඇතුළු මැදපෙරදිග ගුවන් තොටුපළ හරහා ඔස්ට්රේලියාව සහ ශ්රී ලංකාව අතර ගමන් කරන මගීන්ට වැදගත් වනවා.
ගුවන් අවකාශ සීමා පැනවුවහොත් ගුවන් ගමන් ප්රමාද වීම, ගමන් මාර්ග දිගු වීම සහ සම්බන්ධක ගුවන් ගමන් මඟහැරීමේ අවදානමක් පවතිනවා.
කෙසේ වෙතත්, මේ වන විට ඔස්ට්රේලියාව සහ ශ්රී ලංකාව අතර සියලු ගුවන් ගමන් අවලංගු කර ඇති බවට නිල නිවේදනයක් නිකුත් කර නැහැ.
Qatar Airways විසින් 2026 සැප්තැම්බර් 15 දක්වා යාවත්කාලීන කළ ගුවන් ගමන් කාලසටහනක් පවත්වාගෙන යන අතර, පවතින ආරක්ෂක තත්ත්වය හේතුවෙන් කුවේට් වෙත ක්රියාත්මක වූ SriLankan Airlines ගුවන් ගමන්ද මේ වනවිට තාවකාලිකව අත්හිටුවා තිබෙනවා.
ඒ අනුව ශ්රී ලංකාවට යාමට හෝ ශ්රී ලංකාවේ සිට ඔස්ට්රේලියාවට පැමිණීමට නියමිත මගීන්, ගුවන්තොටුපළට පිටත්වීමට පෙර තම ගුවන් ගමනේ තත්ත්වය පරීක්ෂා කළ යුතුයි.
ගුවන් සමාගම වෙත නිවැරදි දුරකථන අංකය සහ විද්යුත් තැපැල් ලිපිනය ලබාදී තිබීමත්, සම්බන්ධක ගුවන් ගමන් අතර ප්රමාණවත් කාලයක් වෙන්කර ගැනීමත් වැදගත් වනවා.
