ඔස්ට්රේලියාවේ පදිංචියට හෝ රැකියා සඳහා පැමිණීමට බලාපොරොත්තු වන විදේශිකයින් සහ දැනට රැඳී සිටින ජාත්යන්තර සිසුන් අනිවාර්යයෙන්ම දැනුවත් විය යුතු සුවිශේෂී පුවතක් ඔස්ට්රේලියානු බලධාරීන් විසින් නිවේදනය කර තිබෙනවා.
සුදුසුකම් නොමැතිව සහ නීතිවිරෝධී ලෙස සංක්රමණික සහ වීසා උපදෙස් ලබාදෙමින්, අසරණ පිරිස් සූරාකන ව්යාජ ඒජන්තවරුන් සහ ජාවාරම්කරුවන් වැටලීම සඳහා ඔස්ට්රේලියානු රජය මේ වන විට දැඩි ක්රියාමාර්ග අනුගමනය කරමින් සිටිනවා.
ඔස්ට්රේලියානු දේශසීමා බලධාරීන් පෙන්වා දෙන්නේ නිසි ලියාපදිංචියකින් තොරව මුදල් අයකරමින් වීසා උපදෙස් ලබාදීම බරපතල වරදක් බවයි.
එවැනි ව්යාජ උපදෙස් මත පදනම්ව වංචනික ලෙස වීසා අයදුම්පත් ඉදිරිපත් කරන විදේශීය පුරවැසියන්ට ද මින් බරපතල ප්රතිවිපාකවලට මුහුණ දීමට සිදුවනවා.
ඒ අනුව ඔවුන්ගේ වත්මන් වීසා බලපත්ර අවලංගු කිරීම, රැඳවුම් භාරයට ගැනීම සහ ඔස්ට්රේලියාවෙන් පිටුවහල් කිරීම වැනි දැඩි දඬුවම් ක්රියාත්මක කිරීමට නියමිතයි.
මේ අතර මෑතකදී ජාත්යන්තර සිසුන් මුළා කරමින් ව්යාජ වීසා අයදුම්පත් ඉදිරිපත් කළ, ඔස්ට්රේලියානු පුරවැසිභාවය නොමැති පුද්ගලයෙකු රටින් පිටුවහල් කිරීමට බලධාරීන් කටයුතු කර තිබෙනවා.
එම පුද්ගලයාට නැවත කිසිදිනක ඔස්ට්රේලියාවට ඇතුළුවීමට නොහැකි වන පරිදි පූර්ණ වීසා තහනමක් ද පනවා ඇති බව සඳහන්.
ඔස්ට්රේලියානු නීතියට අනුව සංක්රමණ හෝ වීසා උපදෙස් ලබා දිය හැක්කේ රජයේ ලියාපදිංචි සංක්රමණ නියෝජිතයෙකුට (Registered Migration Agent) හෝ ඔස්ට්රේලියානු නීතිඥවරයෙකුට (Australian Legal Practitioner) පමණයි.
මෙවැනි වීසා වංචා හෝ නීතිවිරෝධී ඒජන්තවරුන් පිළිබඳව කිසියම් තොරතුරක් වෙතොත්, ඔස්ට්රේලියානු දේශසීමා ආරක්ෂක බලකායේ Border Watch ආයතනය වෙත රහසිගතව තොරතුරු සපයන ලෙස ද මහජනතාවට දැනුම් දී තිබෙනවා.
