දේශගුණික විපර්යාස පාලනය කිරීම සඳහා ඔස්ට්‍රේලියාව ගෙන ඇති ක්‍රියාමාර්ග ප්‍රමාණවත් නොවන බවට ලෝක ප්‍රකට පරිසර ක්‍රියාකාරිනියක වන Greta Thunberg දැඩි විවේචනයක් එල්ල කර තිබෙනවා.

තුර්කියේ Antalya නගරයේ පැවැත්වෙන එක්සත් ජාතීන්ගේ COP31 දේශගුණික සමුළුවට සහභාගී වෙමින් 23 හැවිරිදි Greta Thunberg ප්‍රකාශ කර ඇත්තේ දේශගුණික අර්බුදයට මුහුණ දීම සඳහා ඔස්ට්‍රේලියාව මීට වඩා වේගයෙන් ක්‍රියා කළ යුතු බවයි.

ඔස්ට්‍රේලියාවේ දේශගුණික ක්‍රියාමාර්ග ඉතා මන්දගාමී බවට එල්ල වන විවේචන සමඟ එකඟ වන්නේ දැයි මාධ්‍යවේදීන් විමසූ අවස්ථාවේදී ඇය පැවසුවේ “Even a snail would agree with that” යනුවෙනුයි. එනම්, ඔස්ට්‍රේලියාව මීට වඩා වේගයෙන් කටයුතු කළ යුතු බවට ගොළුබෙල්ලෙකු පවා එකඟ වනු ඇති බවටයි ඇය චෝදනා කර තිබෙන්නේ.

දේශගුණික විපර්යාස තවදුරටත් අනාගතයේ ඇතිවිය හැකි තර්ජනයක් පමණක් නොව, මේ වන විටත් මිනිස් ජීවිතවලට බලපාන බරපතළ අර්බුදයක් වී ඇති බවයි ඇය අවධාරණය කර තිබෙන්නේ.

ලෝක නායකයන් ප්‍රමාණවත් ක්‍රියාමාර්ග නොගතහොත් ඉදිරි වසරවලදී ස්වභාවික විපත් සහ පාරිසරික හානි තවදුරටත් උග්‍ර විය හැකි බවට ද Thunberg අනතුරු අඟවා තිබෙනවා.

මේ අතර, එම සමුළුව ඇමතූ ඔස්ට්‍රේලියානු ආදිවාසී නියෝජිත Rikki Dank රජයෙන් ඉල්ලා සිටියේ නව ගල්අඟුරු, තෙල් සහ ගෑස් ව්‍යාපෘති සඳහා අනුමැතිය ලබාදීම නතර කරන ලෙසයි.

කෙසේ වෙතත්, ඔස්ට්‍රේලියානු රජය මෙම විවේචන හමුවේ, සිය දේශගුණික ප්‍රතිපත්ති ආරක්ෂා කරමින් පවසන්නේ, රටේ කාබන් විමෝචනය අවම කිරීම සඳහා සැලකිය යුතු ප්‍රගතියක් ලබා ඇති බවයි.

අගමැති Anthony Albanese සිය රජයේ ක්‍රියාමාර්ග ආරක්ෂා කර ඇති අතර, දේශගුණික හා බලශක්ති අමාත්‍ය Chris Bowen පුනර්ජනනීය බලශක්තිය, විදුලිකරණය සහ ජාත්‍යන්තර සහයෝගීතාව වැඩිදියුණු කිරීමේ වැදගත්කම සමුළුවේදී අවධාරණය කර තිබෙනවා.