ඔස්ට්‍රේලියාවේ Queensland ප්‍රාන්තයේ පදිංචි 55 හැවිරිදි කාන්තාවක් කැස්බෑවන් ආශ්‍රිත විවිධ භාණ්ඩ 5,373ක එකතුවක් නිර්මාණය කරමින් නව ගිනස් ලෝක වාර්තාවක් පිහිටුවා තිබෙනවා.

Brisbane නගරයට කිලෝමීටර් 300ක් පමණ උතුරින් පිහිටි Hervey Bay ප්‍රදේශයේ පදිංචි Tania Murphy මෙලෙස ලොව විශාලතම කැස්බෑ සහ ගොඩබිම් ඉබ්බන් ආශ්‍රිත භාණ්ඩ එකතුවට හිමිකම් කියනවා.

ඇයගේ මෙම අසාමාන්‍ය විනෝදාංශය ආරම්භ වී ඇත්තේ වයස අවුරුදු පහේදී සිය සහෝදරියට අයත් කැස්බෑ හැඩයේ සෙල්ලම් බඩුවක් නැවත ලබාදීම ප්‍රතික්ෂේප කිරීමත් සමඟයි.

එතැන් සිට වසර 50කට ආසන්න කාලයක් කැස්බෑවන් ආශ්‍රිත විවිධ භාණ්ඩ එකතු කිරීමට ඇය දැඩි උනන්දුවක් දක්වා තිබෙනවා.

විශාල ලී කැටයම්, කුඩා පිඟන් මැටි රූප, පිඟන්, වීදුරු භාණ්ඩ, චිත්‍ර සහ සෙල්ලම් බඩු ඇතුළු විවිධ වර්ගයේ භාණ්ඩ දහස් ගණනක් ඇයගේ එකතුවට ඇතුළත් වනවා.

සංචාරවලදී මෙන්ම පැරණි භාණ්ඩ අලෙවිසැල් සහ Garage Sales හරහා මෙම භාණ්ඩ මිලදී ගෙන ඇති අතර, උපන්දින සහ නත්තල් තෑගි ලෙස ද ඇයට කැස්බෑ ආශ්‍රිත භාණ්ඩ ලැබී තිබෙනවා.

මෙම ගිනස් ලෝක වාර්තාව ලබාගැනීම සඳහා ඇයට සෑම භාණ්ඩයක්ම වෙන වෙනම ඡායාරූපගත කර, ඒවායේ විස්තර, නිෂ්පාදිත ද්‍රව්‍ය සහ හඳුනාගැනීමේ අංක ඇතුළත් දත්ත ගබඩාවක් සකස් කිරීමට සිදුවුණා.

ස්වාධීන සාක්ෂිකරුවන් දෙදෙනෙකු පැය 17කට ආසන්න කාලයක් වැය කරමින් මෙම භාණ්ඩ ගණනය කර ඇති අතර, ගිනස් ලෝක වාර්තා ආයතනයට ගොනු 6,000කට ආසන්න සංඛ්‍යාවක් ඉදිරිපත් කර තිබෙනවා.

මාස තුනක පමණ ඇගයීම් ක්‍රියාවලියකින් පසුව ඇයගේ වාර්තාව නිල වශයෙන් පිළිගැනීමට Guinness World Records ආයතනය පියවර ගෙන තිබෙනවා.

කෙසේ වෙතත්, භාණ්ඩ 5,373කින් සිය එකතුව නතර කිරීමට ඇය සූදානම් නොමැති අතර, එය භාණ්ඩ 10,000ක් දක්වා වර්ධනය කිරීම තම මීළඟ ඉලක්කය බවයි Tania Murphy පවසන්නේ.

මේ වනවිට ඇයගේ නිවසේ ගරාජය කුඩා කෞතුකාගාරයක් ලෙස සකස් කර ඇති අතර, ඉදිරියේදී කලින් වේලාවක් වෙන්කරගන්නා ජනතාවට නොමිලේ එම එකතුව නැරඹීමට අවස්ථාව ලබාදීමට ද ඇය සැලසුම් කර තිබෙනවා.