ඔස්ට්‍රේලියාවේ Qantas ගුවන් සේවය වෙනුවෙන් නිර්මාණය කෙරෙන විශේෂ ගුවන් යානයක් පැය 24කට අධික කාලයක් නොනවත්වා පියාසර කරමින් නව Guinness ලෝක වාර්තාවක් පිහිටුවා තිබෙනවා.

Qantas සමාගමේ Project Sunrise වැඩසටහන සඳහා නිර්මාණය කළ Airbus A350-1000ULR ගුවන් යානය මෙල්බන් සිට ප්‍රංශයේ Toulouse දක්වා කිලෝමීටර් 23,155ක දුරක් පැය 24යි මිනිත්තු 24කින් පියාසර කර තිබෙනවා.

මෙම ඓතිහාසික පරීක්ෂණ ගුවන් ගමන 2026 ජූලි 27 සහ 28 යන දිනවල සිදුකර ඇති අතර, එය වාණිජ මගී ගුවන් යානා වර්ගයකින් සිදුකළ වැඩිම දුර පියාසර කිරීම ලෙස නොවැම්බර් 9 වැනිදා Guinness World Records විසින් නිල වශයෙන් පිළිගෙන තිබෙනවා.

මෙම ගුවන් යානය මෙල්බන්වලින් පිටත්ව පැසිෆික් සාගරය හරහා ඇමෙරිකාවේ Los Angeles දෙසට ගමන් කර, උතුරු ඇමෙරිකාව සහ අත්ලාන්තික් සාගරය පසුකර ලන්ඩනයට ඉහළින් පියාසර කිරීමෙන් අනතුරුවයි ප්‍රංශයට ළඟා වී ඇත්තේ.

ගමන අතරතුර ගුවන් කාර්ය මණ්ඩලයට හිරු උදාවීම් දෙකක් සහ හිරු බැසයෑම් දෙකක් දැකගැනීමට අවස්ථාව ලැබී තිබීම විශේෂත්වයක්.

මෙම ගුවන් ගමනට සහභාගී වී ඇත්තේ පුද්ගලයන් 13 දෙනකු පමණක් වන අතර, ඔවුන් අතර Airbus පරීක්ෂණ නියමුවන්, Qantas නියමුවන් සහ ඉංජිනේරු විශේෂඥයන් සිටිනවා.

මෙය සාමාන්‍ය මගීන් රැගෙන ගිය ගුවන් ගමනක් නොව, ඉදිරියේදී ක්‍රියාත්මක කිරීමට නියමිත ඉතා දිගු ගුවන් ගමන් සඳහා සිදුකළ විශේෂ පරීක්ෂණයක් බව ද සඳහන්.

මෙම Airbus A350-1000ULR ගුවන් යානයට අමතර ඉන්ධන ලීටර් 20,000ක් රැගෙන යා හැකි පරිදි විශේෂ ඉන්ධන ටැංකියක් සවිකර තිබෙනවා.

Qantas සමාගම සිය Project Sunrise වැඩසටහන යටතේ 2027 ඔක්තෝබර් මාසයේ සිට Sydney සහ London අතර නොනවතින මගී ගුවන් සේවාවක් ආරම්භ කිරීමටයි සැලසුම් කර ඇත්තේ.

එම සේවාව මඟින් දැනට අතරමැදි නැවතුම් සහිත ගුවන් ගමන්වලට සාපේක්ෂව පැය හතරක පමණ කාලයක් ඉතිරි කරගත හැකි බව Qantas සමාගම පවසනවා.

එමෙන්ම Sydney සිට New York දක්වා නොනවතින ගුවන් සේවාවක් 2028 වසරේ මැද භාගයේදී ආරම්භ කිරීමට ද සැලසුම් කර තිබෙනවා.

නව ගුවන් සේවාව සඳහා යොදාගන්නා පළමු ගුවන් යානය 2027 අප්‍රේල් මාසයේදී Qantas සමාගමට භාරදීමට නියමිතයි.