ඔස්ට්‍රේලියාවේ තාවකාලික වීසා ලබාගැනීමට බලාපොරොත්තු වන විදේශිකයන්ට බලපාන තවත් වැදගත් සංක්‍රමණ නීති වෙනසක් අද සිට ක්‍රියාත්මක වී තිබෙනවා.

ඒ අනුව Subclass 407 හෙවත් Training Visa සඳහා ඔස්ට්‍රේලියාව තුළ සිට නව අයදුම්පත් ඉදිරිපත් කිරීම සාමාන්‍ය අයදුම්කරුවන්ට තහනම් කර තිබෙනවා.

Department of Home Affairs නිවේදනය කරන්නේ, මෙම වීසා සඳහා අයදුම් කරන අවස්ථාවේදී මෙන්ම වීසා අනුමත කරන අවස්ථාවේදීද අයදුම්කරු ඔස්ට්‍රේලියාවෙන් පිටත සිටිය යුතු බවයි.

එබැවින් දැනට ඔස්ට්‍රේලියාවේ Student Visa, Graduate Visa හෝ වෙනත් තාවකාලික වීසා මත රැඳී සිටින පුද්ගලයෙකුට 407 Training Visa සඳහා අයදුම් කිරීමට අවශ්‍ය නම්, සාමාන්‍යයෙන් පළමුව ඔස්ට්‍රේලියාවෙන් පිටවීමට සිදුවනවා.

විශේෂත්වය වන්නේ ImmiAccount පද්ධතිය හරහා ඔස්ට්‍රේලියාව තුළ සිට අයදුම්පතක් ඉදිරිපත් කිරීමට තාක්ෂණිකව හැකියාව තිබුණද, එවැනි අයදුම්පතක් නීත්‍යනුකූලව වලංගු නොවන බව ආගමන දෙපාර්තමේන්තුව පැහැදිලිව ප්‍රකාශ කර තිබීමයි.

එමෙන්ම මෙවැනි අවලංගු අයදුම්පතක් ඉදිරිපත් කිරීම පුද්ගලයෙකුගේ පවතින වීසා තත්ත්වයටද බලපෑම් ඇති කළ හැකි අතර, අයදුම්පත අවලංගු බවට ගන්නා තීරණය සම්බන්ධයෙන් Administrative Review Tribunal වෙත සාමාන්‍ය merits review ඉල්ලීමක් කළ නොහැකි බවද සඳහන්.

විදේශයක සිට 407 වීසා අයදුම් කරන පුද්ගලයන්ට එම අයදුම්පත මත පදනම්ව Bridging Visa එකක්ද හිමිවන්නේ නැහැ.

තවත් වැදගත් කරුණක් වන්නේ අයදුම්කරුවෙකුට ඔස්ට්‍රේලියාවෙන් පිටත සිට 407 වීසා අයදුම් කිරීමෙන් පසුව වෙනත් වලංගු වීසා බලපත්‍රයක් යටතේ ඔස්ට්‍රේලියාවට පැමිණීමට හැකියාව තිබුණද, 407 වීසා අනුමත කරන අවස්ථාවේදී නැවත ඔස්ට්‍රේලියාවෙන් පිටත සිටීමට සිදුවීමයි.

කෙසේ වෙතත්, නොවැම්බර් 12 වැනිදාට පෙර නීත්‍යනුකූලව ඉදිරිපත් කළ 407 Training Visa අයදුම්පත් සඳහා මෙම නව නීති අදාළ නොවන අතර, ඒවා අයදුම් කළ අවස්ථාවේ පැවති නීති යටතේ සලකා බලනු ලබනවා.

මේ අතර මෙම වසරේ මාර්තු 11 වැනිදා සිට ක්‍රියාත්මක වූ තවත් නීති වෙනසකට අනුව, 407 Training Visa අයදුම් කිරීමට පෙර අදාළ ආයතනයේ Sponsorship සහ අයදුම්කරුගේ Nomination අනුමත වී තිබීමද අවශ්‍ය වනවා.

ආගමන බලධාරීන් පෙන්වා දෙන්නේ Training Visa වැඩසටහනේ නීතිමය විශ්වසනීයත්වය ආරක්ෂා කිරීම සහ තාවකාලික වීසා මාරු කරමින් ඔස්ට්‍රේලියාවේ රැඳී සිටීමේ ක්‍රම පාලනය කිරීම මෙම වෙනස්කම්වල අරමුණ බවයි.

ඒ අනුව දැනට ඔස්ට්‍රේලියාවේ සිට 407 Training Visa සඳහා අයදුම් කිරීමට සැලසුම් කරන පුද්ගලයන් තම වර්තමාන වීසා කාලය, Sponsorship සහ Nomination අනුමැතිය මෙන්ම විදේශගත වීමේ අවශ්‍යතාව පිළිබඳව විශේෂ අවධානයක් යොමු කළ යුතු වනවා.