ඔස්ට්‍රේලියාවේ Australia Post ආයතනය, තැපැල් කාර්යාලවලින් පාර්සල් ලබාගැනීමේදී හැඳුනුම්පතක් ඉදිරිපත් කිරීමේ අවශ්‍යතාව ඇතැම් පාරිභෝගිකයන් සඳහා ඉවත් කරමින් නව පහසුකමක් හඳුන්වා දී තිබෙනවා.

App Collect ලෙස නම් කර ඇති මෙම නව සේවාව යටතේ, සුදුසුකම් සපුරන පාරිභෝගිකයන්ට Driver Licence, Passport හෝ වෙනත් භෞතික හැඳුනුම්පතක් රැගෙන නොගොස් තම ජංගම දුරකථනය භාවිතයෙන් පාර්සල් ලබාගැනීමට අවස්ථාව හිමිවනවා.

Australia Post ආයතනය අද නිවේදනය කළේ මෙම පහසුකම ඔස්ට්‍රේලියාව පුරා ක්‍රියාත්මක කර ඇති බවයි.

නව සේවාව භාවිත කිරීමට පාරිභෝගිකයන්ට Aus Post App එක සහ අනන්‍යතාව තහවුරු කළ MyPost ගිණුමක් තිබිය යුතුයි.

එමෙන්ම පාරිභෝගිකයාගේ ජංගම දුරකථන අංකය සහ ලිපිනය, පාර්සලයේ සඳහන් තොරතුරු සමඟ ගැළපිය යුතු බවද Australia Post ආයතනය සඳහන් කරනවා.

පාර්සලයක් ලබාගැනීමට සූදානම් වූ විට සුදුසුකම් ලත් පාරිභෝගිකයන්ට App එක හරහා Awaiting Collection යන දැනුම්දීම ලැබෙන අතර, එහි ඇති QR Code එක තැපැල් කාර්යාලයේ සේවකයන්ට පෙන්වීමෙන් අමතර හැඳුනුම්පතක් ඉදිරිපත් නොකර පාර්සලය ලබාගත හැකියි.

Australia Post ආයතනය සිදුකළ සමීක්ෂණයකට අනුව, තැපැල් කාර්යාලයෙන් පාර්සල් ලබාගැනීමට පැමිණෙන පාරිභෝගිකයන් හතර දෙනෙකුගෙන් එක් අයෙකුට තම හැඳුනුම්පත රැගෙන ඒම අමතක වී තිබෙනවා.

ඒ හේතුවෙන් පාර්සල් ලබාගැනීමේදී සිදුවන අපහසුතා අවම කිරීම සහ සේවාව වඩාත් වේගවත් කිරීම මෙම නව ක්‍රමයේ ප්‍රධාන අරමුණයි.

කෙසේ වෙතත්, මෙම පහසුකම සියලුම පාර්සල් සඳහා අදාළ නොවන අතර, වයස් සීමාවන්ට යටත් භාණ්ඩ සහ විශේෂ අනන්‍යතා පරීක්ෂාවන් අවශ්‍ය පාර්සල් ලබාගැනීමේදී තවදුරටත් හැඳුනුම්පතක් ඉදිරිපත් කිරීමට සිදුවිය හැකියි.

Australia Post ආයතනයේ Retail, Brand and Marketing අංශයේ විධායක සාමාන්‍යාධිකාරී Josh Bannister පවසන්නේ මෙම නව පහසුකම මගින් පාරිභෝගිකයන්ට වඩාත් පහසුවෙන් සහ වේගයෙන් තම පාර්සල් ලබාගැනීමට අවස්ථාව සැලසෙන බවයි.

විශේෂයෙන් නොවැම්බර් සහ දෙසැම්බර් මාසවල නත්තල් සමය වෙනුවෙන් පාර්සල් බෙදාහැරීම් ඉහළ යන අවස්ථාවක මෙම නව සේවාව හඳුන්වාදීම පාරිභෝගිකයන්ට පහසුවක් වනු ඇතැයි අපේක්ෂා කෙරෙනවා.

මෙම පහසුකම ලබාගැනීමට අවශ්‍ය පුද්ගලයන්ට Australia Post App එක නොමිලේ Download කර MyPost ගිණුමක් ආරම්භ කළ හැකියි.