ඔස්ට්‍රේලියාවේ ඉහළ ජීවන වියදම හමුවේ Western Australia ප්‍රාන්තයේ සුදුසුකම් ලත් රියදුරන් පිරිසකට ඉන්ධන මිලෙන් නව discount එකක් ලබාදීමට ප්‍රාන්ත රජය පියවර ගෙන තිබෙනවා.

නොවැම්බර් 11 වැනිදා Remembrance Day සැමරුමට සමගාමීව ප්‍රකාශයට පත්කර ඇති මෙම වැඩසටහන යටතේ, සුදුසුකම් සපුරන හිටපු ආරක්ෂක හමුදා සාමාජිකයන්ට සහ ඔවුන්ගේ පවුල්වල ඇතැම් සාමාජිකයන්ට ඉන්ධන ලීටරයකට සත 4ක වට්ටමක් හිමිවනවා.

මෙම සහනය United Petroleum සමාගම සමඟ එක්ව ක්‍රියාත්මක කරන අතර, Western Australia ප්‍රාන්තයේ එම සමාගමට අයත් සහභාගී වන ඉන්ධන පිරවුම්හල් 30කට වැඩි සංඛ්‍යාවකදී වට්ටම ලබාගැනීමට හැකියාව පවතිනවා.

කෙසේ වෙතත්, මෙම වට්ටම සියලුම රියදුරන්ට හිමි නොවන අතර, Western Australia රජය විසින් නිකුත් කරන වලංගු State Concession Card එකක් හිමි සුදුසුකම් ලත් පුද්ගලයන්ට පමණක් ලබාගත හැකියි.

2021 ජන සංගණන දත්ත අනුව Western Australia ප්‍රාන්තයේ හිටපු ආරක්ෂක හමුදා සාමාජිකයන් 55,000කට වැඩි පිරිසක් ජීවත් වන නමුත්, ඔවුන් සියලුදෙනාම මෙම සහනයට සුදුසුකම් ලබන බව මින් අදහස් වන්නේ නැහැ.

නව සහනය ලබාගැනීමට සුදුසුකම් ඇති පුද්ගලයන් United Petroleum සමඟ ලියාපදිංචි වී, එහි App එක හරහා ඉන්ධන වට්ටම භාවිත කළ යුතුයි.

Western Australia ප්‍රාන්තයේ Veterans Minister Hannah Beazley පවසන්නේ රට වෙනුවෙන් සේවය කළ හිටපු ආරක්ෂක හමුදා සාමාජිකයන්ට සහ ඔවුන්ගේ පවුල්වලට පවතින ජීවන වියදම් පීඩනය හමුවේ සහනයක් ලබාදීම මෙම වැඩසටහනේ අරමුණ බවයි.

මේ අතර ඔස්ට්‍රේලියාවේ වෙනත් ප්‍රාන්තවල ද ජීවන වියදම් පීඩනය අවම කිරීම සඳහා විදුලි බිල්පත් සහන, වාහන ලියාපදිංචි ගාස්තු සහන සහ පවුල් සඳහා විවිධ මූල්‍ය ආධාර වැඩසටහන් ක්‍රියාත්මක කර තිබෙනවා.

Western Australia ප්‍රාන්තයේ නව ඉන්ධන සහනය නොවැම්බර් 11 වැනිදා සිට ක්‍රියාත්මක වන අතර, සුදුසුකම් සහිත පුද්ගලයන්ට United Petroleum හරහා එය ලබාගැනීමට හැකියාව පවතිනවා.