යුරෝපයේ විශාලතම ගුවන් සේවය වන Ryanair සමාගම ගුවන් මගීන්ගේ ගමන් මලු භාරගැනීමේ කාලසීමාව සම්බන්ධයෙන් නව නීතියක් ක්‍රියාත්මක කර තිබෙනවා.

ඒ අනුව මීට පෙර ගුවන් ගමනට මිනිත්තු 40කට පෙර අවසන් කළ ගමන් මලු භාරගැනීම, නොවැම්බර් 10 සිට ගුවන් යානය පිටත්වීමට මිනිත්තු 60කට පෙර අවසන් කිරීමට තීරණය කර තිබෙනවා.

යුරෝපීය ගුවන්තොටුපළවල ආරක්ෂක පරීක්ෂණ සහ විදේශ ගමන් බලපත්‍ර පරීක්ෂා කිරීමේදී ඇතිවන දිගු පෝලිම් හේතුවෙන් මගීන්ට ගුවන් ගමන් මඟහැරීම වැළැක්වීම මෙහි අරමුණයි.

කෙසේ වෙතත්, මෙම වෙනස බලපාන්නේ ගුවන් තොටුපළේදී භාරදෙන ගමන් මලු සහිත මගීන්ට පමණක් බව සමාගම පවසනවා.

මේ අතර ඔස්ට්‍රේලියාවේ Qantas, Virgin Australia සහ Jetstar ගුවන් සේවාවල ද ගමන් මලු භාරගැනීමේ කාලසීමා වෙනස් වනවා.

Qantasහි දේශීය ගුවන් ගමන් සඳහා මිනිත්තු 30කට පෙර සහ ජාත්‍යන්තර ගමන් සඳහා මිනිත්තු 60කට පෙර ද Virgin Australiaහි දේශීය ගමන් සඳහා මිනිත්තු 30කට පෙර සහ ජාත්‍යන්තර ගමන් සඳහා මිනිත්තු 60කට පෙර ද Jetstarහි දේශීය ගමන් සඳහා මිනිත්තු 40කට පෙර සහ ජාත්‍යන්තර ගමන් සඳහා මිනිත්තු 60කට පෙර ලෙසයි කාලසීමා දැක්‌වෙන්නේ.

එබැවින් ගුවන් ගමන් සඳහා පිටත්වීමට පෙර අදාළ ගුවන් සේවාවේ ගමන් මලු භාරගැනීමේ අවසන් වේලාව පරීක්ෂා කර, ප්‍රමාණවත් වේලාවක් ඇතිව ගුවන්තොටුපළට පැමිණෙන ලෙස මගීන්ට උපදෙස් ලබාදී තිබෙනවා.