ඔස්ට්‍රේලියාවේ Employer-Sponsored Visa අයදුම්කරුවන්ට අදාළ Bridging Visa B (BVB) අයදුම්පත් ඇගයීමේ ක්‍රමවේදය නොවැම්බර් 30 වැනිදා සිට වෙනස් කිරීමට නියමිත බව වාර්තා වනවා.

මෙම වෙනස ප්‍රධාන වශයෙන් Subclass 482, 186 සහ 494 වීසා අයදුම්කරුවන්ට සහ ඔවුන්ගේ පවුල්වල සාමාජිකයන්ට බලපානවා.

නව ක්‍රමවේදය යටතේ විදේශගත වී නැවත ඔස්ට්‍රේලියාවට පැමිණීමට ලබාදෙන BVB ගමන් අවසර කාලසීමාව සාමාන්‍යයෙන් කෙටි විය හැකි අතර, විදේශගත වීමට ඇති හේතුව පැහැදිලිව ඉදිරිපත් කළ යුතු වනවා.

විශේෂයෙන් නිවාඩුවකට යාම හෝ පවුලේ සාමාජිකයන් හමුවීමට යාම යන හේතු පමණක් සඳහන් කිරීම ප්‍රමාණවත් නොවිය හැකි අතර, අවශ්‍ය අවස්ථාවල ඒවා තහවුරු කරන ලියකියවිලි ද ඉදිරිපත් කළ යුතුයි.

පවුලේ හදිසි රෝගී තත්ත්වයක්, විවාහයක්, අවමංගල්‍යයක් හෝ රැකියාවට සම්බන්ධ විදේශ ගමනක් වැනි අවස්ථාවල අදාළ සාක්ෂි ඉදිරිපත් කිරීම වැදගත් වනවා.

නොවැම්බර් 30ට පෙර ඉදිරිපත් කරන BVB අයදුම්පත් දැනට පවතින ඇගයීමේ ක්‍රමවේදය අනුව සලකා බැලීමට නියමිතයි.

Home Affairs දෙපාර්තමේන්තුව නිර්දේශ කරන්නේ සැලසුම් කළ විදේශ ගමනට සති දෙකකට නොඅඩු සහ මාස තුනකට නොවැඩි කාලයකට පෙර BVB සඳහා අයදුම් කරන ලෙසයි.

මෙය නව වීසා නීතියක් නොව, දැනට පවතින නීති සහ ප්‍රතිපත්ති වඩාත් දැඩිව ක්‍රියාත්මක කිරීමේ වෙනසක් බව ද සඳහන් වෙනවා.