ඔස්ට්‍රේලියාවේ බැංකු ඉතුරුම් ගිණුම් හිමියන්ට තමන්ට හිමිවිය යුතු පොලී මුදල් සම්පූර්ණයෙන් නොලැබෙන අවදානමක් පවතින බවට Australian Securities and Investments Commission (ASIC) ආයතනය අනතුරු අඟවා තිබෙනවා.

බැංකු විසින් ප්‍රචාරණය කරන ඉහළ පොලී අනුපාත ඇතැම් විට විශේෂ කොන්දේසිවලට යටත් වන අතර, එම කොන්දේසි නිසි ලෙස අවබෝධ කර නොගැනීම හේතුවෙන් ගනුදෙනුකරුවන්ට අපේක්ෂිත පොලී ප්‍රතිලාභ අහිමි විය හැකි බවයි එම ආයතනය පෙන්වා දෙන්නේ.

එවැනි පසුබිමක, Welcome Rate ඉතුරුම් පොලී දීමනාව ප්‍රචාරණය කිරීමේදී නීති උල්ලංඝනය කළ බව පිළිගත් Macquarie බැංකුව, ගනුදෙනුකරුවන් 40,000කට ආසන්න පිරිසකට ඔස්ට්‍රේලියානු ඩොලර් මිලියන 8.8ක් ආපසු ගෙවා ඇති අතර, බැංකුවට ඩොලර් මිලියන 14ක දඩයක් පැනවීම කළ යුතු බවට ASIC ආයතනය අධිකරණයට යෝජනාවක් ඉදිරිපත් කර තිබෙනවා.

ASIC ආයතනය පෙන්වා දෙන්නේ, ඇතැම් බැංකුවල විශේෂ ඉතුරුම් පොලී දීමනා සාමාන්‍ය පොලියට අමතරව ලැබෙන බවට ප්‍රචාරණය කරන නමුත්, සැබවින්ම එම දීමනා සාමාන්‍ය පොලියට අමතරව නොව, මුල් මාස කිහිපය තුළ සාමාන්‍ය පොලිය වෙනුවට ලබාදෙන විශේෂ පොලී අනුපාත ක්‍රමයක් විය හැකි බවයි.

මේ හේතුවෙන් තම ඉතුරුම් ගිණුමට සැබවින්ම ලැබෙන පොලී අනුපාතය, විශේෂ දීමනාවල කොන්දේසි සහ ඒවා ක්‍රියාත්මක වන කාලසීමාවන් පරීක්ෂා කරන ලෙස ASIC ආයතනය ඔස්ට්‍රේලියානුවන්ගෙන් වැඩිදුරටත් ඉල්ලා සිටිනවා.