ශරීරයේ බර අඩුකර ගැනීම සඳහා Mounjaro වැනි ඖෂධ භාවිත කරන පුද්ගලයන්ට, බර අඩුවීමත් සමඟ මාංශ පේශි ප්‍රමාණය ද අහිමි විය හැකි බව ඔස්ට්‍රේලියාවේ සිදුකළ නවතම පර්යේෂණයකින් අනාවරණය වී තිබෙනවා.

University of Western Australia පර්යේෂකයන් සිදුකළ මෙම ලොව පළමු අධ්‍යයනයෙන් හෙළිවී ඇත්තේ, බර අඩුකරන ඖෂධ සමඟ Strength Training හෙවත් මාංශ පේශි ශක්තිමත් කරන ව්‍යායාමවල නිරත වීමෙන් එම පටක අහිමිවීම සැලකිය යුතු ලෙස අවම කරගත හැකි බවයි.

මෙම පර්යේෂණය සඳහා වැඩිහිටියන් 120 දෙනකු සහභාගී කරගෙන ඇති අතර, ඔවුන් සියලුදෙනාටම සති 40ක කාලයක් Mounjaro ඖෂධය ලබාදී තිබෙනවා.

ඉන් එක් කණ්ඩායමක් නිතිපතා බර ඉසිලීම ඇතුළු Strength Training ව්‍යායාමවල නිරත කර ඇති අතර, අනෙක් කණ්ඩායම එවැනි විශේෂ ව්‍යායාම වැඩසටහනකට සහභාගී වී නැහැ.

පර්යේෂණය අවසානයේ කණ්ඩායම් දෙකේම පුද්ගලයන්ගේ ශරීර බර සාමාන්‍යයෙන් කිලෝග්‍රෑම් 22කින් පමණ අඩුවී තිබුණා.

කෙසේ වෙතත්, ව්‍යායාම කළ කණ්ඩායමේ මාංශ පේශි ඇතුළු Lean Tissue අහිමිවීම අනෙක් කණ්ඩායමට සාපේක්ෂව සියයට 25කින් පමණ අඩුවී ඇති බව පර්යේෂකයන් සොයාගෙන තිබෙනවා.

එමෙන්ම ව්‍යායාම කළ පුද්ගලයන්ගේ ශාරීරික ශක්තිය සහ එදිනෙදා කටයුතු සිදුකිරීමේ හැකියාව ද වැඩිදියුණු වී තිබෙනවා.

පර්යේෂකයන් පෙන්වා දෙන්නේ බර වේගයෙන් අඩුවීමේදී මාංශ පේශි අහිමිවීම, විශේෂයෙන්ම වැඩිහිටි පුද්ගලයන්ගේ ශාරීරික දුර්වලතාව, සමබරතාව අඩුවීම සහ වැටීම් හේතුවෙන් සිදුවන අනතුරු සඳහා අවදානමක් ඇති කළ හැකි බවයි.

ඒ අනුව බර අඩුකරන ඖෂධ නිර්දේශ කිරීමේදී වෛද්‍යවරුන් විසින් ඒ සමඟ සුදුසු ව්‍යායාම වැඩසටහනක් ද නිර්දේශ කිරීම වැදගත් බව පර්යේෂණයට සම්බන්ධ විශේෂඥයන් අවධාරණය කරනවා.

මෙවැනි ව්‍යායාම සඳහා අනිවාර්යයෙන්ම Gym එකකට යාම අවශ්‍ය නොවන අතර, නිවසේ සිටම සිදුකළ හැකි Squats, Lunges සහ Push-ups වැනි ව්‍යායාමද ප්‍රයෝජනවත් විය හැකි බවයි ඔවුන් පෙන්වා දෙන්නේ.

ඒ අනුව, බර අඩුකරන ඖෂධ භාවිත කිරීමේදී ශරීරයේ බර අඩුකර ගැනීම පමණක් නොව, මාංශ පේශි සහ ශාරීරික ශක්තිය ආරක්ෂා කරගැනීම ද අතිශයින් වැදගත් බව මෙම ඔස්ට්‍රේලියානු පර්යේෂණයෙන් තහවුරු වී තිබෙනවා.