ඔස්ට්‍රේලියාවේ Victoria ප්‍රාන්තයේ Gippsland ප්‍රදේශයේ ඝන වනාන්තරයක දින හයක් තිස්සේ අතුරුදන්ව සිටි 17 හැවිරිදි William නමැති තරුණයා අද (12) උදෑසන ජීවතුන් අතර ව සිටියදී සොයාගෙන තිබෙනවා.

පසුගිය නොවැම්බර් 6 වැනිදා Walhalla East ප්‍රදේශයේ මිතුරෙකු සමඟ කඳවුරු බැඳීමට ගිය ඔහු, තවත් උපකරණ කිහිපයක් රැගෙන ඒමට පිටත්ව ගොස් ආපසු පැමිණෙන මාර්ගය සොයාගත නොහැකිව වනාන්තරයේ අතරමං වී ඇති බවයි වාර්තා වන්නේ.

ජංගම දුරකථනය, ආහාර සහ පානීය ජලය කඳවුරේ තබා ගොස් තිබූ William, දින කිහිපයක් වනාන්තරය තුළ ඇවිද යාමෙන් පසු බෑවුමකින් පහළට ඇදවැටී ඇති අතර, අවසන් දින දෙක ගංගාවක් අසල රැඳී සිට තිබෙනවා.

එම දින හය තුළ ඔහු දිවි රැකගෙන ඇත්තේ අර්තාපල් චිප්ස් පැකට්ටුවක් ආහාරයට ගනිමින් සහ ගංගාවේ ජලය පානය කරමින් බවයි පැවසෙන්නේ.

මේ අතර, දින හයක් පුරා ක්‍රියාත්මක වූ සෝදිසි මෙහෙයුමකදී, Stoney Creek ප්‍රදේශය ආසන්නයේ තිබූ උපකරණ පෙට්ටියක් නිරීක්ෂණය කළ පොලිස් හෙලිකොප්ටර් කණ්ඩායමක්, ගංගාවක් අසළ පිහිටි ගලක් මත වැතිර සිටි William ව සොයාගෙන තිබෙනවා.

සම පිළිස්සීම් සහ සුළු තුවාල තිබුණද, ඔහු යහපත් සෞඛ්‍ය තත්ත්වයෙන් පසුවන අතර, වැඩිදුර වෛද්‍ය පරීක්ෂණ සඳහා රෝහල්ගත කර ඇති බවයි පොලිසිය පවසන්නේ.

දින හයකට පසු සිය පුතු නැවත ජීවතුන් අතර දැකගැනීමට ලැබීම ගැන මහත් සතුටට පත් ඔහුගේ මව Elizabeth Barkley, පුතු සොයාගැනීමට කැපවූ සියලුදෙනාට සිය කෘතඥතාව පළ කර තිබෙනවා.