ඔස්ට්‍රේලියාවේ ප්‍රධාන බැංකු හතරෙන් එකක් වන National Australia Bank හෙවත් NAB බැංකුව, වසර 14ක කාලයක් පුරා සිය සේවකයන් 66,000කට ආසන්න පිරිසකට නියමිත වැටුප් සහ දීමනා නිසි ලෙස ගෙවා නොමැති බව පිළිගෙන තිබෙනවා.

Fair Work Ombudsman ආයතනය අද නිකුත් කළ නිවේදනයකට අනුව, බැංකුව 2012 සිට 2026 දක්වා කාලය තුළ සේවකයන් 65,999 දෙනෙකුට ඩොලර් මිලියන 127ක වැටුප් සහ දීමනා අඩුවෙන් ගෙවා ඇති බවයි අනාවරණය වී ඇත්තේ.

ඒ අනුව අදාළ සේවකයන්ට හිමි නොගෙවූ වැටුප්, පොලී සහ Superannuation දීමනා ඇතුළුව ඩොලර් මිලියන 169ක මුදලක් ආපසු ගෙවීමට NAB බැංකුව එකඟ වී තිබෙනවා.

ඇතැම් සේවකයන්ට ඩොලර් 87,000කට වැඩි මුදලක් හිමිවීමට නියමිත අතර, එක් සේවකයෙකුට ලැබෙන සාමාන්‍ය ආපසු ගෙවීම ඩොලර් 1,934ක් පමණ වන බව සඳහන්.

මෙම වැටුප් ගෙවීමේ ගැටලුව 2019 වසරේදී බැංකුව විසින් හඳුනාගෙන තිබුණද, එය නිසි ලෙස විසඳීමට අපොහොසත් වීම හේතුවෙන් 2024 වසර වනවිටත් සේවකයන්ට අඩුවෙන් වැටුප් ගෙවීම සිදුව ඇති බව විමර්ශනවලදී අනාවරණය වී තිබෙනවා.

පැරණි වැටුප් ගෙවීමේ පරිගණක පද්ධති, සේවක තොරතුරු නිසි ලෙස පවත්වාගෙන නොයෑම සහ අභ්‍යන්තර පාලන දුර්වලතා මෙම ගැටලුවට ප්‍රධාන හේතු වී ඇති බව Fair Work Ombudsman ආයතනය පෙන්වා දෙනවා.

full-time, part-time සහ Casual සේවකයන් මෙම ගැටලුවෙන් පීඩාවට පත්ව ඇති අතර, සාමාන්‍ය වැටුප්වලට අමතරව Overtime, Penalty Rates, නිවාඩු දීමනා සහ Superannuation ගෙවීම් ද නිසි ලෙස සිදුකර නොමැති බව සඳහන්.

මේ වනවිට NAB බැංකුව අදාළ සේවකයන්ට ඩොලර් මිලියන 155කට වැඩි මුදලක් ආපසු ගෙවා ඇති අතර, ඉතිරි ගෙවීම් සම්පූර්ණ කිරීමට ද පියවර ගනිමින් සිටිනවා.

මීට අමතරව, නීතිමය බැඳීමක් සහිත එකඟතාවක් යටතේ ඔස්ට්‍රේලියානු රජයට ඩොලර් මිලියන 2ක අතිරේක ගෙවීමක් කිරීමට ද NAB බැංකුව එකඟ වී තිබෙනවා.

සිදුවූ වැරදි සම්බන්ධයෙන් NAB බැංකුව සිය සේවකයන්ගෙන් සමාව ඉල්ලා ඇති අතර, ඉදිරියේදී මෙවැනි ගැටලු ඇතිවීම වැළැක්වීම සඳහා වැටුප් ගෙවීමේ පද්ධති සහ අභ්‍යන්තර ක්‍රියාවලීන් වැඩිදියුණු කරන බව ද ප්‍රකාශ කර තිබෙනවා.