දේශගුණික විපර්යාස පාලනය කිරීම සඳහා ඔස්ට්‍රේලියාව සිය වගකීම ඉටුකරමින් සිටින බව අගමැති Anthony Albanese ප්‍රකාශ කළද, ගල්අඟුරු සහ ස්වාභාවික වායු ව්‍යාපෘති තවදුරටත් පුළුල් කිරීම සම්බන්ධයෙන් ඔස්ට්‍රේලියානු රජයට ජාත්‍යන්තර දේශගුණික සංවිධාන සහ පරිසර ක්‍රියාකාරීන්ගෙන් විවේචන එල්ල වී තිබෙනවා.

තුර්කියේ Antalya නගරයේ පැවැත්වෙන එක්සත් ජාතීන්ගේ COP31 ජාත්‍යන්තර දේශගුණික සමුළුව අමතමින් අගමැතිවරයා සඳහන් කළේ, පිරිසිදු බලශක්ති නිෂ්පාදනය සහ කාබන් විමෝචනය අවම කිරීම සම්බන්ධයෙන් ඔස්ට්‍රේලියාව සැලකිය යුතු ප්‍රගතියක් ලබා ඇති බවයි.

විශේෂයෙන් සූර්ය බලශක්තිය, නිවාසවල බැටරි පද්ධති සහ විදුලි බලයෙන් ක්‍රියාත්මක වන තාක්ෂණයන් ප්‍රචලිත කිරීම සඳහා ඔස්ට්‍රේලියාව ගෙන ඇති පියවර අගමැතිවරයා මෙහිදී අවධාරණය කර තිබෙනවා.

මේ අතර ඔස්ට්‍රේලියාවේ Climate Change and Energy Minister Chris Bowen සමුළුව අමතමින් ප්‍රකාශ කළේ, ලෝකය මේ වනවිට දේශගුණික විපර්යාස, යුද ගැටුම්, ඉන්ධන සැපයුම් අර්බුද සහ ජීවන වියදම් ඉහළ යෑම ඇතුළු අර්බුද කිහිපයකට එකවර මුහුණ දෙමින් සිටින බවයි.

එවැනි තත්ත්වයක් තුළ දේශගුණික විපර්යාස පාලනය කිරීම සඳහා ජාත්‍යන්තර සහයෝගිතාව තවදුරටත් ශක්තිමත් කිරීම අත්‍යවශ්‍ය බව ඔහු අවධාරණය කළා.

කෙසේ වෙතත්, එක්සත් ජාතීන්ගේ මහලේකම් António Guterres සමුළුව අමතමින් ගල්අඟුරු, ඛනිජ තෙල් සහ ස්වාභාවික වායු වැනි Fossil Fuels භාවිතයෙන් ලෝකය ක්‍රමානුකූලව ඉවත් විය යුතු බවට දැඩි අනතුරු ඇඟවීමක් සිදුකර තිබෙනවා.

ගෝලීය උෂ්ණත්වය ඉහළ යෑම සෙල්සියස් අංශක 1.5ක සීමාවට ආසන්නව පාලනය කිරීම සඳහා නව ගල්අඟුරු, තෙල් සහ ගෑස් යටිතල පහසුකම් පුළුල් කිරීම නතර කළ යුතු බවයි ඔහු පෙන්වා දී ඇත්තේ.

එහෙත් අගමැති Albanese සිය ප්‍රධාන දේශනයේදී Fossil Fuels භාවිතයෙන් ඉවත් වීම පිළිබඳ පැහැදිලි සැලැස්මක් ඉදිරිපත් නොකිරීම පරිසර සංවිධානවල විවේචනයට ලක්ව තිබෙනවා.

Australian Conservation Foundation ආයතනයේ ප්‍රධාන විධායක නිලධාරී සහ හිටපු Greens නායක Adam Bandt පවසන්නේ, ඔස්ට්‍රේලියාව සැබෑ දේශගුණික නායකත්වයක් පෙන්වීමට නම් නව ගල්අඟුරු සහ ගෑස් ව්‍යාපෘති අනුමත කිරීම නතර කිරීමටද පියවර ගත යුතු බවයි.

ඔස්ට්‍රේලියාව පිරිසිදු බලශක්තිය සඳහා ආයෝජනය වැඩි කරන අතරතුර නව Fossil Fuel ව්‍යාපෘති අනුමත කිරීම අතර පවතින පරස්පරතාව මෙවර COP31 සමුළුවේ ප්‍රධාන විවාදයක් බවට පත්ව තිබෙනවා.