ලබන 28 වැනිදා පැවැත්වීමට නියමිත වික්ටෝරියා ප්‍රාන්ත මැතිවරණයට සති තුනකටත් අඩු කාලයක් ඉතිරිව තිබියදී, Labor පක්ෂය ගත් මැතිවරණ තීරණයක් හේතුවෙන් Greens පක්ෂය සහ Labor පක්ෂය අතර දේශපාලන ගැටුමක් ඇතිවී තිබෙනවා.

මෙල්බන් නගරයේ Prahran මැතිවරණ කොට්ඨාසයේදී තම අපේක්ෂකයාට පළමු මනාපය ලබාදෙන ලෙස ඡන්දදායකයන්ගෙන් ඉල්ලා සිටියත්, ඉතිරි මනාප ලබාදිය යුතු ආකාරය පිළිබඳ නිර්දේශ නොකිරීමට Labor පක්ෂය තීරණය කර තිබෙනවා.

මෙවැනි ක්‍රමවේදයක් Open Ticket ලෙස හැඳින්වෙන අතර, එමඟින් ඡන්දදායකයන්ට තමන් කැමති ආකාරයට අනෙකුත් අපේක්ෂකයන් ශ්‍රේණිගත කිරීමට අවස්ථාව හිමිවෙනවා.

කෙසේ වෙතත්, වික්ටෝරියා Greens පක්ෂ නායිකා Ellen Sandell චෝදනා කරන්නේ මෙම තීරණය Greens පක්ෂයට අවාසිදායක වන අතර Liberal පක්ෂයට වාසිදායක විය හැකි බවයි.

Labor පක්ෂය දිගින් දිගටම Liberal සහ One Nation පක්ෂවලට එරෙහිව අදහස් පළ කළත්, දැන් ගෙන ඇති මෙම තීරණය එම පක්ෂවලට වාසි සැලසිය හැකි බවයි ඇය පවසන්නේ.

2025 වසරේ පැවති අතුරු මැතිවරණයේදී Prahran ආසනය Greens පක්ෂයෙන් දිනාගැනීමට Liberal පක්ෂයේ Rachel Westaway සමත්වුණා.

එම මැතිවරණයේදී Greens පක්ෂයට සියයට 13.4ක ඡන්ද හැරීමක් අවාසිදායක ලෙස වාර්තා වූ අතර, එවර Labor පක්ෂය අපේක්ෂකයකු ඉදිරිපත් කර තිබුණේ නැහැ.

Prahran ආසනයට අමතරව Caulfield ආසනයේදී ද Open Ticket ක්‍රමය අනුගමනය කිරීමට Labor පක්ෂය තීරණය කර තිබෙනවා.

මේ අතර, ඊයේ ප්‍රකාශයට පත් කළ Resolve Political Monitor ජනමත සමීක්ෂණය අනුව වික්ටෝරියා ප්‍රාන්තයේ පක්ෂවල පළමු මනාප ඡන්ද සහාය මෙසේ දැක්වෙනවා.

Liberal–National Coalition – 30%

One Nation – 23%

Labor – 22%

Greens – 13%

නොවැම්බර් 2 සිට 7 දක්වා පුද්ගලයන් 1,000ක නියැදියක් ඇසුරෙන් සිදුකළ මෙම සමීක්ෂණයෙන් Labor පක්ෂයට සාපේක්ෂව Coalition පක්ෂයට වැඩි පළමු මනාප සහායක් වාර්තා වී තිබෙනවා.

කෙසේ වෙතත්, මෙම ප්‍රතිශත මැතිවරණයේ අවසන් ප්‍රතිඵලය නියෝජනය කරන්නේ නැහැ.