ඔස්ට්‍රේලියාවේ බදු වාර්තා ඉදිරිපත් කිරීමේදී රැකියාවට අදාළ වියදම් වෙනුවෙන් අසාමාන්‍ය ලෙස වැඩි බදු අඩුකිරීම් (Tax Deductions) ඉල්ලා ඇති පුද්ගලයන් 26,500කට පමණ Australian Taxation Office (ATO) විසින් අනතුරු ඇඟවීමේ ලිපි යොමු කර තිබෙනවා.

ජූලි පළමුවැනිදා සිට මිලියන ගණනක ඔස්ට්‍රේලියානුවන් සිය බදු වාර්තා ඉදිරිපත් කර ඇති අතර, ඒවා පරීක්ෂා කිරීමේදී සමාන රැකියාවල නිරත සහ සමාන ආදායම් ලබන පුද්ගලයන්ට සාපේක්ෂව ඇතැම් අය ඉහළ බදු අඩුකිරීම් ඉල්ලා ඇති බවයි ATO ආයතනය හඳුනාගෙන ඇත්තේ.

මේ සඳහා ATO ආයතනය දත්ත විශ්ලේෂණ තාක්ෂණය භාවිත කරන අතර, සේවා යෝජකයන්, බැංකු, රාජ්‍ය ආයතන සහ වෙනත් පාර්ශ්වයන්ගෙන් ලැබෙන තොරතුරු සමඟ බදු වාර්තා සංසන්දනය කරන බව සඳහන්.

ඒ අනුව සැක සහිත හෝ අසාමාන්‍ය ලෙස පෙනෙන බදු අඩුකිරීම් සම්බන්ධයෙන් අදාළ පුද්ගලයන්ගෙන් පැහැදිලි කිරීම් හෝ වියදම් සනාථ කරන ලේඛන ඉල්ලා සිටීමට ATO ආයතනයට හැකියාව තිබෙනවා.

කෙසේ වෙතත්, මෙවැනි ලිපියක් ලැබීමෙන් අදාළ පුද්ගලයා බදු වාර්තාවේ වැරැද්දක් කර ඇති බව අනිවාර්යයෙන්ම අදහස් නොවන බව බදු විශේෂඥයන් පෙන්වා දෙනවා.

H&R Block ආයතනයේ බදු සන්නිවේදන අධ්‍යක්ෂ Mark Chapman පවසන්නේ එකම රැකියාවක නිරත පුද්ගලයන් දෙදෙනෙකුගේ වියදම් පවා සැලකිය යුතු ලෙස වෙනස් විය හැකි බවයි.

උදාහරණයක් ලෙස, තමන්ගේම මෝටර් රථයෙන් රැකියාව සඳහා ගමන් කරන පුද්ගලයෙකුගේ වියදම්, කාර්යාලයක පමණක් සේවය කරන අයෙකුගේ වියදම්වලට වඩා ඉහළ විය හැකියි.

එමෙන්ම නිවසේ සිට වැඩ කරන පුද්ගලයන්ට ද වෙනත් සේවකයන්ට සාපේක්ෂව වැඩි බදු අඩුකිරීම් සඳහා සුදුසුකම් තිබිය හැකි බව ඔහු පෙන්වා දෙනවා.

නීත්‍යනුකූලව ඉල්ලා සිටිය හැකි බදු අඩුකිරීම් සඳහා නිශ්චිත උපරිම මුදල් සීමාවක් නොමැති නමුත්, එම වියදම් සැබෑවටම සිදුවූ බවත් බදු අඩුකිරීමට සුදුසු බවත් සනාථ කළ හැකි විය යුතුයි.

ATO වෙතින් මෙවැනි ලිපියක් ලැබුණහොත් එය නොසලකා නොහැර, ඉල්ලා ඇති තොරතුරු සහ ප්‍රතිචාර දැක්විය යුතු අවසන් දිනය පරීක්ෂා කරන ලෙස බදු විශේෂඥයන් උපදෙස් ලබා දෙනවා.