ලෝක ඉතිහාසයේ වාර්තාගත උණුසුම්ම ඔක්තෝබර් මාසය 2026 වසරේදී සටහන් වී ඇති අතර, ඔස්ට්‍රේලියාවට ද සාමාන්‍යයට වඩා උණුසුම් Summer එකක් ඇතිවිය හැකි බවට කාලගුණ විද්‍යාඥයන් අනතුරු අඟවා තිබෙනවා.

යුරෝපා සංගමයේ Copernicus Climate Change Service නිකුත් කළ නවතම දත්ත අනුව, පසුගිය ඔක්තෝබර් මාසයේ ගෝලීය සාමාන්‍ය උෂ්ණත්වය සෙල්සියස් අංශක 15.35ක් දක්වා ඉහළ ගොස් තිබෙනවා.

එය කාර්මික යුගයට පෙර පැවති සාමාන්‍ය උෂ්ණත්වයට වඩා සෙල්සියස් අංශක 1.75ක වැඩිවීමක්.

මේ අතර ඔස්ට්‍රේලියාවේ Victoria ප්‍රාන්තය මෙතෙක් වාර්තා වූ තුන්වැනි උණුසුම්ම ඔක්තෝබර් මාසය අත්විඳ ඇති අතර, එහි සාමාන්‍ය උෂ්ණත්වය දිගුකාලීන සාමාන්‍යයට වඩා අංශක 2.15කින් ඉහළ ගොස් තිබෙනවා.

කාලගුණ අනාවැකි අනුව දෙසැම්බර් සිට පෙබරවාරි දක්වා ඔස්ට්‍රේලියාවේ බොහෝ ප්‍රදේශවල දිවා සහ රාත්‍රී උෂ්ණත්වය සාමාන්‍යයට වඩා ඉහළ යාමේ අවදානමක් පවතිනවා.

දැනටමත් Queensland සහ Northern Territory ප්‍රදේශ කිහිපයක සෙල්සියස් අංශක 40ට ආසන්න උෂ්ණත්වයක් සමඟ දැඩි තාප තරංග අනතුරු ඇඟවීම් නිකුත් කර තිබෙනවා.

මේ අතර ශක්තිමත් වෙමින් පවතින El Niño කාලගුණ තත්ත්වය හේතුවෙන් 2027 වසරේදී ද ලොව පුරා දැඩි උණුසුම සහ ආන්තික කාලගුණික තත්ත්වයන් ඇතිවීමේ අවදානම ඉහළ යා හැකි බව ලෝක කාලගුණ විද්‍යා සංවිධානය පෙන්වා දෙනවා.

විශේෂයෙන් වැඩිහිටියන්, කුඩා දරුවන් සහ රෝගී පුද්ගලයන් දැඩි උණුසුමෙන් ආරක්ෂා වීමට අවශ්‍ය පියවර ගන්නා ලෙසයි සෞඛ්‍ය බලධාරීන් උපදෙස් ලබාදී ඇත්තේ.