ඔස්ට්‍රේලියාවේ ජීවන වියදම ඉහළ යාම, බැංකු පොලී අනුපාත වැඩිවීම සහ ඉන්ධන මිල ඉහළ යාම හේතුවෙන් ජනතාවගේ ආර්ථික විශ්වාසය වසර හතරකින් වාර්තා වූ අවම මට්ටමට පහත වැටී තිබෙනවා.

Westpac සහ Melbourne Institute විසින් ඊයේ නිකුත් කළ නවතම සමීක්ෂණයට අනුව, පාරිභෝගික විශ්වාස දර්ශකය අඛණ්ඩව තුන්වැනි මාසයටත් පහත වැටී ඒකක 78.2ක් ලෙස සටහන් වුණා.

ඔස්ට්‍රේලියාවේ වාර්ෂික උද්ධමනය සියයට 4.3ක් දක්වා ඉහළ ගොස් ඇති අතර, පෙට්‍රල් ලීටරයක මිල ඩොලර් 2.40ට ආසන්න වී තිබෙනවා.

මේ අතර Reserve Bank of Australia විසින් මේ වසරේ පස්වැනි වරටත් පොලී අනුපාත ඉහළ නංවා ඇති අතර, නිල පොලී අනුපාතය සියයට 4.85ක් දක්වා ඉහළ ගොස් තිබෙනවා.

එය වසර 18ක ඉහළම මට්ටමයි.

නිවාස ණය ගෙවන පවුල් ඉන් දැඩි පීඩනයකට ලක්ව ඇති අතර, ඔවුන්ගේ පාරිභෝගික විශ්වාස දර්ශකය ඒකක 68.1ක් දක්වා පහත වැටී තිබෙනවා.

මේ අතර එළඹෙන නත්තල් සමයේදී තෑගි සඳහා වියදම් අඩු කිරීමට ජනතාවගෙන් සියයට 38ක් සැලසුම් කර ඇති අතර, සියයට 46ක් පසුගිය වසරට සමාන මුදලක් වැය කිරීමට අපේක්ෂා කරනවා.

මෙම තත්ත්වය ඉදිරි මාසවල පාරිභෝගික වියදම් සහ සිල්ලර වෙළෙඳාමට බලපෑම් කළ හැකි බවයි ආර්ථික විශේෂඥයන් පෙන්වා දෙන්නේ.