ඔස්ට්‍රේලියාවේ ඇතැම් ප්‍රාදේශීය ප්‍රදේශවල පවතින සේවක හිඟය සම්බන්ධයෙන් බ්‍රිතාන්‍යය සමඟ සාකච්ඡා කළ බව අගමැති Anthony Albanese පවසනවා.

Canberra හි පැවති මාධ්‍ය හමුවකදී ඔහු සඳහන් කළේ, බ්‍රිතාන්‍ය අගමැති Andy Burnham සමඟ පැවති සාකච්ඡාවලදී ඔස්ට්‍රේලියාවේ සේවක අවශ්‍යතා පිළිබඳවත් අවධානය යොමු කළ බවයි.

විශේෂයෙන්ම ඔස්ට්‍රේලියාවේ ප්‍රාදේශීය ප්‍රදේශවලට අවශ්‍ය සේවකයන් ලබාගැනීමේදී පවතින ගැටලු පිළිබඳ ව එහිදී සාකච්ඡා කර තිබෙනවා.

මෙහිදී Working Holiday Visa යටතේ ඔස්ට්‍රේලියාවට පැමිණෙන බ්‍රිතාන්‍ය තරුණයන් හෙවත් Backpackers ලා සම්බන්ධයෙන් පවතින නීතිරීති පිළිබඳවත් දෙරට අතර අවධානය යොමුව තිබෙනවා.

දැනට පවතින ගිවිසුම යටතේ බ්‍රිතාන්‍ය Backpackers ලාට වීසා කාලය දීර්ඝ කරගැනීම සඳහා අනිවාර්යයෙන්ම ප්‍රාදේශීය ප්‍රදේශවල රැකියා කිරීමේ අවශ්‍යතාවක් නොමැති වීමත් මෙම සාකච්ඡාවට පසුබිම් වී තිබෙනවා.

කෙසේ වෙතත්, ඔස්ට්‍රේලියානු රජය අපේක්ෂා කරන්නේ ‍ඔස්ට්‍රේලියාවට පැමිණෙන තරුණයන්ට නගර ආශ්‍රිත ප්‍රදේශවලට පමණක් සීමා නොවී ප්‍රාදේශීය ඔස්ට්‍රේලියාවේ රැකියා සහ ජීවන අත්දැකීම් ලබාගැනීමට වැඩි අවස්ථාවක් සැලසීමයි.

මෙම සාකච්ඡා, ඉදිරියේදී වීසා නීතිරීතිවල වෙනසකට මඟ පාදයිද යන්න පිළිබඳව, ඔස්ට්‍රේලියාවේ රැකියා සහ වීසා අපේක්ෂාවෙන් සිටින බොහෝ දෙනාගේ අවධානය යොමුව තිබෙනවා.