ඔස්ට්‍රේලියාවේ Public Transport භාවිතයේදී Headphones නොමැතිව ජංගම දුරකථනවලින් සංගීතය හෝ වීඩියෝ ශබ්ද නඟා ප්‍රචාරය කරන මගීන්ට ඩොලර් 500ක් දක්වා දඩ පැනවිය හැකි බවට අනතුරු ඇඟවීමක් නිකුත් කර තිබෙනවා.

මගීන්ට බාධාවක් වන මෙම හැසිරීම සම්බන්ධයෙන් එක්සත් රාජධානිය ද දැඩි පියවර ගැනීමට සූදානම් වීමත් සමඟ ඔස්ට්‍රේලියාවේ පවතින නීති සහ දඩ මුදල් පිළිබඳව ද අවධානය යොමුව තිබෙනවා.

ඒ අනුව Western Australia ප්‍රාන්තයේදී ශබ්දය නිවා දමන ලෙස දැනුම් දුන්නද එය ප්‍රතික්ෂේප කරන මගීන්ට එම අවස්ථාවේදීම ඩොලර් 100ක දඩයක් පැනවිය හැකි අතර, උපරිම දඩය ඩොලර් 500ක් වනවා.

South Australia ප්‍රාන්තයේදී මගීන්ට කරදරයක් වන හැසිරීම් සඳහා ඩොලර් 160ක දඩයක් පැනවිය හැකි අතර, Victoria ප්‍රාන්තයේ එම වරද සඳහා උපරිම දඩය ඩොලර් 261ක් වනවා.

එමෙන්ම New South Wales ප්‍රාන්තයේදී අනෙකුත් මගීන්ගේ පහසුවට හෝ ආරක්ෂාවට හිතාමතා බාධා කිරීම සම්බන්ධයෙන් ඩොලර් 400ක දඩයක් පැනවිය හැකියි. Queensland, Tasmania සහ Australian Capital Territory යන ප්‍රදේශවල ද මෙවැනි බාධාකාරී ශබ්ද සම්බන්ධයෙන් නීති ක්‍රියාත්මක වනවා.

විශේෂයෙන්ම Victoria ප්‍රාන්තයේ 2026 ජනවාරි පළමුවැනිදා සිට නොවැම්බර් 11 වැනිදා දක්වා කාලය තුළ Public Transport භාවිතයේදී ශබ්ද උපකරණ හෝ සංගීත භාණ්ඩ භාවිත කිරීම සම්බන්ධයෙන් එක් මගියෙකුට ඩොලර් 261ක දඩයක් පනවා තිබෙනවා.

මේ අතර Public Transport යනු සියලුදෙනාටම පොදු ස්ථානයක් බව සිහිපත් කරමින්, සෙසු මගීන්ට බාධාවක් නොවන ලෙස Headphones භාවිත කරමින් සංගීතයට සවන් දෙන ලෙස ද මගීන්ගෙන් ඉල්ලීමක් කර තිබෙනවා.