ඔස්ට්‍රේලියානු රජය හඳුන්වා දී ඇති නව Capital Gains Tax (CGT) බදු ප්‍රතිසංස්කරණ අතිශයින් සංකීර්ණ බව පවසමින්, කුඩා ව්‍යාපාර හිමියන් 350කට වැඩි පිරිසකගේ සහාය ඇතිව ව්‍යාපාරික සංවිධාන සහ ආර්ථික විශේෂඥයන් එම ක්‍රමය සරල කරන ලෙස රජයෙන් ඉල්ලා තිබෙනවා.

2026 ෆෙඩරල් අයවැයෙන් ප්‍රකාශයට පත්කළ මෙම වෙනස්කම් අනුව, 2027 ජූලි 1 වැනිදා සිට උපයන ප්‍රාග්ධන ලාභ සඳහා දැනට පවතින 50%ක CGT වට්ටම වෙනුවට උද්ධමනය මත පදනම් වූ නව ගණනය කිරීමේ ක්‍රමයක් සහ අවම 30%ක බදු අනුපාතයක් හඳුන්වා දීමට නියමිතයි.

කෙසේ වෙතත්, මෙම වෙනස්කම් හේතුවෙන් කුඩා ව්‍යාපාර, නව ව්‍යාපාර සහ ආයෝජකයන්ට අමතර බදු බරක් සහ සංකීර්ණ පරිපාලන ගැටලු ඇතිවිය හැකි බවට විවේචන එල්ල වී තිබෙනවා.

ඊට විකල්පයක් ලෙස ස්වාධීන පාර්ලිමේන්තු මන්ත්‍රී Allegra Spender, ව්‍යාපාරික වත්කම් සහ සුදුසුකම් ලබන කොටස් ඇතුළු Active Assets සඳහා 40%ක CGT වට්ටමක් ලබාදීමටත්, ආයෝජන දේපළ සඳහා උද්ධමනය මත පදනම් වූ ක්‍රමය පවත්වාගෙන යාමටත් යෝජනා කර තිබෙනවා.

Australian Industry Group හි ප්‍රධාන විධායක Innes Willox ඇතුළු ව්‍යාපාරික නියෝජිතයන් පෙන්වා දෙන්නේ, රජයේ නව බදු ක්‍රමය ව්‍යාපාරික ආයෝජන සහ නවෝත්පාදන අධෛර්යමත් කළ හැකි බවයි.

කෙසේ වෙතත්, බදු ක්‍රමයේ සාධාරණත්වය වැඩිදියුණු කිරීම සහ පළමු නිවස මිලදී ගන්නා පුද්ගලයන්ට වැඩි අවස්ථා ලබාදීම රජයේ අරමුණ වන අතර, Allegra Spenderගේ විකල්ප යෝජනාව මෙතෙක් නීතියක් ලෙස සම්මත වී නැහැ.