යුරෝපා තරග සංචාරයකදී ජාත්‍යන්තර මේස පන්දු තරගාවලි තුනකට සහභාගි වී රන් පදක්කම් හතරක් දිනාගත් ශ්‍රී ලාංකික යොවුන් ක්‍රීඩක තාවි සමරවීර ඊයේ (12) යළි දිවයිනට පැමිණියා.

ඉතාලියේ Lignano සහ ස්ලෝවැකියාවේ Senec නගරවල පැවැති වයස අවුරුදු 11න් පහළ මේස පන්දු තරගාවලිවලින් රන් පදක්කම බැගින් දිනාගැනීමට ඔහු සමත් වුණා.

අනතුරුව මොන්ටිනිග්‍රෝවේ Podgorica නගරයේ පැවැති WTT Youth Contender තරගාවලියේදී වයස අවුරුදු 11න් පහළ සහ 13න් පහළ පිරිමි කේවල ශූරතා දෙකම දිනාගනිමින් තවත් රන් පදක්කම් දෙකක් සිය නමට එක්කරගත් බවයි වාර්තා වන්නේ.

එකම WTT Youth Contender තරගාවලියකදී මෙලෙස රන් පදක්කම් දෙකක් දිනාගත් පළමු ශ්‍රී ලාංකික ක්‍රීඩකයා ලෙස ද තාවි නව වාර්තාවක් පිහිටුවා තිබෙනවා.

පුංචි වයසින් මෙවැනි සුවිශේෂී ජයග්‍රහණයක් හිමිකරගත් තාවි සමරවීර, ලොව පුරා වෙසෙන ශ්‍රී ලාංකිකයන්ට මහත් අභිමානයක් එක්කළ ක්‍රීඩකයෙකු බවට පත්ව සිටිනවා.