ඔස්ට්‍රේලියාවේ රාජ්‍ය සේවකයන් සඳහා වාර්ෂිකව වැය කරන මුදල ඩොලර් බිලියන 266.1ක් දක්වා ඉහළ යාමත් සමඟ රජයේ වියදම් අඩු කිරීම සහ රාජ්‍ය සේවක රැකියා කප්පාදු කිරීම සම්බන්ධයෙන් නව සාකච්ඡාවක් ආරම්භ වී තිබෙනවා.

ඔස්ට්‍රේලියානු සංඛ්‍යාලේඛන කාර්යාංශයේ (ABS) නවතම දත්ත අනුව, 2025–26 මූල්‍ය වර්ෂයේදී රාජ්‍ය සේවක වැටුප් වියදම ඩොලර් බිලියන 16.5කින් ඉහළ ගොස් ඇති අතර, රාජ්‍ය අංශයේ රැකියා සංඛ්‍යාව මිලියන 2.66කට ආසන්න වී තිබෙනවා.

මේ අතර, අගමැති Anthony Albaneseගේ රජය දෙසැම්බර් මාසයේ අයවැය යාවත්කාලීන කිරීමට පෙර වියදම් අඩු කිරීමේ ක්‍රම සොයමින් සිටින අතර, විපක්ෂය ඩොලර් බිලියන 31ක වියදම් කප්පාදුවක් ඉල්ලා සිටිනවා.

වික්ටෝරියා ප්‍රාන්ත රජය ද ඉහළ තනතුරුවල රාජ්‍ය සේවක රැකියා සිය ගණනක් අඩු කිරීමට පියවර ගනිමින් සිටින අතර, එමගින් වසර හතරක් තුළ ඩොලර් මිලියන 484ක් ඉතිරි කරගැනීමට අපේක්ෂා කරනවා.

කෙසේ වෙතත්, Monash විශ්වවිද්‍යාලයේ Associate Professor Zareh Ghazarian අනතුරු අඟවන්නේ රාජ්‍ය සේවකයන් ඉවත් කිරීමෙන් තාවකාලිකව මුදල් ඉතිරි වුවද, එම සේවාවන් පෞද්ගලික කොන්ත්‍රාත්කරුවන් හරහා ලබාගැනීමට සිදුවුවහොත් රජයට වැඩි මුදලක් වැයවිය හැකි බවයි.

ඒ අනුව රාජ්‍ය සේවයේ වියදම් පාලනය කිරීමේ අවශ්‍යතාව ඉහළ ගොස් තිබුණද, රට පුරා විශාල රැකියා කප්පාදුවක් සිදුකිරීමට මෙතෙක් අවසන් තීරණයක් ගෙන නැහැ.