ලොව විශාලතම Cryptocurrency හුවමාරු ආයතනය වන Binance, iPhone භාවිත කරන්නන්ගේ පෞද්ගලික තොරතුරු සොරාගැනීමේ අවදානමක් ඇති බවට හදිසි අනතුරු ඇඟවීමක් නිකුත් කර තිබෙනවා.

Apple සමාගමේ iOS 26 සහ iOS 27 මෘදුකාංග සංස්කරණ කිහිපයක හඳුනාගෙන ඇති “worse_query” නමැති ආරක්ෂක දුර්වලතාව හේතුවෙන් හානිකර Apps හරහා වෙනත් Appsවල ගබඩා කර ඇති රහස්‍ය තොරතුරු ලබාගැනීමේ හැකියාවක් පවතින බවයි වාර්තා වන්නේ.

මෙම දුර්වලතාව හරහා Cryptocurrency Walletවල රහස් යතුරු, ගිණුම්වලට පිවිසීමේ තොරතුරු සහ වෙනත් පෞද්ගලික දත්ත අවදානමට ලක්විය හැකි බවයි Binance ආයතනය පෙන්වා දෙන්නේ.

ඒ හේතුවෙන්, Apple App Store වෙතින් නොව වෙනත් විශ්වාස කළ නොහැකි මූලාශ්‍රවලින් install කර ඇති Apps ඉවත් කරන ලෙසත්, iPhone මෘදුකාංග සහ Apps නවතම නිල සංස්කරණවලට update කරන ලෙසත් පරිශීලකයන්ට උපදෙස් ලබාදී තිබෙනවා.

කෙසේ වෙතත්, මෙම දුර්වලතාව භාවිත කර Cryptocurrency මුදල් සොරාගත් බවට මෙතෙක් තහවුරු වූ සිද්ධීන් වාර්තා වී නොමැති අතර, Apple සමාගමේ නවතම ආරක්ෂක යාවත්කාලීන කිරීම් මගින් එය සම්පූර්ණයෙන් විසඳී තිබේද යන්නද තවමත් නිශ්චිත තොරතුරු වාර්තා වී නැහැ.

Binance ආයතනය මෑතකදී මුහුණදුන් දැවැන්ත Cryptocurrency සොරකම සහ මෙම iPhone ආරක්ෂක දුර්වලතාව අතර සම්බන්ධයක් මෙතෙක් තහවුරු වී නොමැති අතර, මෙය පූර්ව ආරක්ෂක අනතුරු ඇඟවීමක් පමණක් බවද තාක්ෂණික වාර්තා පෙන්වා දෙනවා.