විදේශයන්හි ජීවත්වන ශ්‍රී ලාංකිකයන්ගේ පවුල්වල සාමාජිකයන්ට ගාස්තු අය කිරීමකින් තොරව ද්විත්ව පුරවැසිභාවය ලබාදීමට ශ්‍රී ලංකා රජය නව යෝජනාවක් ඉදිරිපත් කර තිබෙනවා.

ජනාධිපති අනුර කුමාර දිසානායක මහතා 2027 වසර සඳහා වන අයවැය කතාව ඉදිරිපත් කරමින් මෙම යෝජනාව ප්‍රකාශයට පත් කර තිබෙනවා.

ඒ අනුව Global Sri Lankan Heritage Citizenship නමින් නව වැඩසටහනක් හඳුන්වාදීමට රජය සැලසුම් කර ඇති අතර, එම වැඩසටහන යටතේ ද්විත්ව පුරවැසිභාවය සඳහා අයදුම් කරන ප්‍රධාන අයදුම්කරුගේ Spouse, Second Generation Children සහ Third Generation Children සඳහා ද්විත්ව පුරවැසිභාවය ලබාගැනීමේදී අය කරන ගාස්තු සම්පූර්ණයෙන් ඉවත් කිරීමට නියමිතයි.

මෙම වැඩපිළිවෙළ යටතේ ද්විත්ව පුරවැසිභාවය සඳහා අදාළ ගාස්තුව ගෙවිය යුතු වන්නේ ප්‍රධාන අයදුම්කරු පමණක් බව ජනාධිපතිවරයා අවධාරණය කර තිබෙනවා.

“අපි ගාස්තුව අය කරන්නේ ප්‍රධාන අයදුම්කරුගෙන් පමණයි. Spouse, Second Generation සහ Third Generation සඳහා කිසිදු ගාස්තුවක් අය කරන්නේ නැහැ,” යනුවෙන් ජනාධිපතිවරයා සිය අයවැය කතාවේදී සඳහන් කර තිබෙනවා.

මීට පෙර ද්විත්ව පුරවැසිභාවය ලබාගැනීමේදී පවුලේ මෙම සාමාජිකයන් වෙනුවෙන් ද වෙන වෙනම ගාස්තු ගෙවීමට සිදුවූ අතර, නව යෝජනාව මගින් එම අමතර මූල්‍ය බර ඉවත් කිරීමට රජය අපේක්ෂා කරනවා.

විශේෂයෙන් ඔස්ට්‍රේලියාව ඇතුළු ලොව පුරා රටවල පදිංචිව සිටින ශ්‍රී ලාංකික සම්භවයක් ඇති පවුල්වලට මෙම යෝජනාව වැදගත් විය හැකි අතර, විදේශයන්හි උපත ලැබූ දෙවන සහ තුන්වන පරම්පරාවේ දරුවන්ට ශ්‍රී ලංකාව සමඟ පවතින සබඳතා තවදුරටත් ශක්තිමත් කරගැනීමට මෙය අවස්ථාවක් වනු ඇති බව අපේක්ෂා කෙරෙනවා.

විදේශයන්හි ජීවත්වන ශ්‍රී ලාංකිකයන් සහ ඔවුන්ගේ දරුවන් සතු දැනුම, වෘත්තීය කුසලතා, අත්දැකීම් සහ හැකියාවන් ශ්‍රී ලංකාවේ අනාගත සංවර්ධනය සඳහා සම්බන්ධ කරගැනීම මෙම වැඩසටහනේ ප්‍රධාන අරමුණක් බව ද ජනාධිපතිවරයා පෙන්වා දී තිබෙනවා.

එමෙන්ම විදෙස්ගත ශ්‍රී ලාංකිකයන් සහ ඔවුන්ගේ දරුවන් තම මව්බිම සමඟ පවත්වාගෙන යන බැඳීම තවදුරටත් ශක්තිමත් කිරීම සඳහා නව ප්‍රවේශයක් අනුගමනය කළ යුතු බව ද ජනාධිපතිවරයා ප්‍රකාශ කර තිබෙනවා.

කෙසේ වෙතත්, මෙම වැඩසටහන තවමත් අයවැය යෝජනාවක් ලෙස ඉදිරිපත් කර ඇති අතර, එය ක්‍රියාත්මක වන නිශ්චිත දිනය, අයදුම්කරුවන් සපුරාලිය යුතු සුදුසුකම් සහ අයදුම් කිරීමේ ක්‍රියාවලිය පිළිබඳ වැඩිදුර තොරතුරු මෙතෙක් ප්‍රකාශයට පත් කර නොමැති බවයි වාර්තා වන්නේ.