2018 වසරේ දකුණු අප්‍රිකාවේ කේප්ටවුන්හිදී සිදුවූ ආන්දෝලනාත්මක පන්දුව පළුදු කිරීමේ සිද්ධිය හෙවත් Sandpapergate සිද්ධිය සම්බන්ධයෙන් ඔස්ට්‍රේලියානු ක්‍රිකට් කණ්ඩායමේ හිටපු ක්‍රීඩක උස්මාන් කවාජා (Usman Khawaja) එල්ල කළ චෝදනා වත්මන් ටෙස්ට් නායක පැට් කමින්ස් (Pat Cummins) දැඩි ලෙස ප්‍රතික්ෂේප කර තිබෙනවා.

Usman Khawaja විසින් රචිත නව ස්වයං චරිතාපදානය වන ‘Sabr’ කෘතියේ සඳහන් කර ඇත්තේ, 2018 වසරේ කේප්ටවුන් ටෙස්ට් තරගයේදී වැලි කඩදාසි භාවිතයෙන් පන්දුව පළුදු කිරීමේ සිද්ධිය පිළිබඳව ඔස්ට්‍රේලියානු කණ්ඩායමේ ක්‍රීඩකයන් සියලුදෙනාම දැන සිටි බවයි.

එමෙන්ම, මෙය ක්‍රීඩකයන් කිහිපදෙනෙකු පමණක් සම්බන්ධ වූ සිද්ධියක් නොව, කණ්ඩායම තුළ කලින් සැලසුම් කළ ක්‍රියාවලියක් බවට ද ඔහු සිය කෘතිය හරහා චෝදනා කර තිබෙනවා.

කෙසේ වෙතත්, අද සිඩ්නි Cricket Centralහි පැවැති විශේෂ මාධ්‍ය හමුවකදී මෙම චෝදනා සියයට සියයක් වැරදි බව පැට් කමින්ස් ප්‍රකාශ කර තිබෙනවා.

තමන් ඇතුළු අනෙකුත් ක්‍රීඩකයන් පන්දුව නීතිවිරෝධී ලෙස පළුදු කිරීමේ සැලැස්මක් නිර්මාණය කළ බවට එල්ල කරන චෝදනා සම්පූර්ණයෙන්ම අසත්‍ය බව ද ඔහු අවධාරණය කළා.

විනාඩි 68ක් පමණ පැවැති මෙම මාධ්‍ය හමුවේදී කමින්ස් සඳහන් කළේ, කවාජාගේ කෘතියේ අන්තර්ගතය දැකීමෙන් තමන් දැඩි ලෙස පුදුමයට පත්වූ බවයි.

Cameron Bancroft විසින් Sandpaper භාවිත කරන අවස්ථාවේදී ප්‍රවේශම් වන ලෙස තමන් ඔහුට උපදෙස් දුන් බවට කවාජා කර ඇති හෙළිදරව්ව පුදුමයට කරුණක් බව කමින්ස් පවසා තිබෙනවා.

කවාජා තවදුරටත් චෝදනා කර ඇත්තේ කේප්ටවුන් තරගයට පෙර Port Elizabethහි පැවැති ටෙස්ට් තරගයේදී ද Sandpaper භාවිත කර පන්දුව පළුදු කර ඇති බවයි.

එහෙත් එවැනි සිද්ධියක් පිළිබඳව තමන් මීට පෙර කිසිවක් දැන නොසිටි බව කමින්ස් පවසා තිබෙනවා.

කෙසේ වෙතත්, කවාජාට තම අත්දැකීම් ප්‍රකාශ කිරීමට ඇති අයිතිය තමන් පිළිගන්නා නමුත්, එල්ල කරන චෝදනාවල වගකීම ද ඔහු භාරගත යුතු බව කමින්ස් අවධාරණය කර තිබෙනවා.

2018 වසරේ සිදුවූ මෙම Sandpapergate සිද්ධිය හේතුවෙන් එවකට ඔස්ට්‍රේලියානු නායක Steve Smith, උපනායක David Warner සහ Cameron Bancroft යන ක්‍රීඩකයන්ට තරග තහනම් පැනවුණා.

මේ අතර David Warner විසින් කවාජාගේ අනාවරණයන්ට සහාය පළ කර ඇති අතර, Mitchell Starc ඇතුළු අනෙකුත් ක්‍රීඩකයන් කිහිපදෙනෙකු එම චෝදනා ප්‍රතික්ෂේප කර තිබෙනවා.