ඉදිරි Spring Season එළඹීමත් සමඟ ඔස්ට්රේලියාවේ ප්රාන්ත සහ පාලන ප්රදේශ රැසක ලැව්ගිනි අවදානම දැඩි ලෙස ඉහළ ගොස් ඇති බව ඔස්ට්රේලියානු සහ නවසීලන්ත ගිනි හා හදිසි සේවා කවුන්සිලය (AFAC) පෙන්වා දෙනවා.
El Niño කාලගුණික තත්ත්වය සක්රීය වීම සහ භූමිය මත වියළි ශාක සහ පඳුරු (Fuel loads) වැඩිවීම මීට ප්රධාන හේතුව වී තිබෙනවා.
AFAC නිකුත් කළ නවතම ඍතුමය වාර්තාවට අනුව, ACT හැර අනෙකුත් සියලුම ප්රාන්ත සහ පාලන ප්රදේශයන්හි ලැව්ගිනි ඇතිවීමේ වැඩි ප්රවණතාවක් පවතිනවා.
ඔස්ට්රේලියාවේ නැගෙනහිර ප්රදේශවල පවතින දැඩි වියළි කාලගුණයත්, උතුරු සහ මධ්යම ප්රදේශවල අධික ලෙස වැවී ඇති ශාක ප්රමාණයත් මෙම අවදානම තවත් වැඩි කර තිබෙනවා.
Flinders Island ඇතුළු දකුණු වික්ටෝරියා, නැගෙනහිර ටස්මේනියාව, ගිනිකොනදිග ක්වීන්ස්ලන්ඩ්, ඊසානදිග නිව් සවුත් වේල්ස් සහ වයඹදිග දකුණු ඔස්ට්රේලියාව යන ප්රදේශයන්හි ඉදිරි මාසවලදී ලැව්ගිනි ඇතිවීමේ වැඩි ඉඩකඩක් පවතින බවයි වාර්තා වන්නේ.
දේශගුණික විද්යාඥයින් සහ ගිනි ආරක්ෂණ විශේෂඥයින් අනතුරු අඟවන්නේ, ප්රබල El Niño තත්ත්වයක් සමඟ Indian Ocean Dipole සක්රීය වීමෙන් ඔස්ට්රේලියාව පුරා අධික උෂ්ණත්වයක් සහ දැඩි වර්ෂාපතන අඩුවීමක් සිදුවිය හැකි බවයි.
උතුරු අර්ධගෝලයේ ඇමරිකාව, කැනඩාව සහ යුරෝපය පුරා ඇතිවූ විනාශකාරී ලැව්ගිනි තත්ත්වයන් දෙස බැලීමේදී, ඔස්ට්රේලියාව ද ඉදිරියේදී එවැනි දැවැන්ත ලැව්ගිනි අර්බුදයකට මුහුණදීමේ වැඩි ඉඩක් පවතින බැවින් බලධාරීන් මේ පිළිබඳව දැඩි අවධානයෙන් පසුවිය යුතු බවයි ටස්මේනියා විශ්වවිද්යාලයේ මහාචාර්ය David Bowman පෙන්වා දෙන්නේ.
එබැවින් තම ප්රදේශයේ පවතින අවදානම් තත්ත්වය පිළිබඳව අවධානයෙන් සිටින ලෙසත්, ලැව්ගිනි ඍතුවට පෙර අවශ්ය පූර්ව සූදානම්වීම් සිදුකර ගන්නා ලෙසත් AFAC ආයතනය ජනතාවගෙන් ඉල්ලා සිටිනවා.
