Melbourne හි Wyndham City Council ප්රදේශයේ පුස්තකාල සේවාවන් වෙනස් කිරීමට ගෙන ඇති යෝජනාවක් සම්බන්ධයෙන් දැඩි විරෝධයක් මතුව තිබෙනවා.
Council එක විසින් “Open Libraries” ලෙස හඳුන්වන නව ක්රමයක් අත්හදා බැලීමට සූදානම් වන අතර, ඒ යටතේ පුස්තකාල කාර්ය මණ්ඩලය නොමැති වේලාවන්වලදී ජනතාවට පුස්තකාල භාවිත කිරීමට අවස්ථාව ලබාදීමට සැලසුම් කර තිබෙනවා.
මෙම ක්රමය මගින් පුස්තකාල විවෘතව තබන වේලාවන් වැඩි කළ හැකි බව Wyndham City Council පවසනවා. එය දැනට පවතින කාර්ය මණ්ඩලය සහිත පුස්තකාල සේවාවන්ට අමතර සේවාවක් ලෙස ක්රියාත්මක කිරීමට සලකා බලන බවත් Council එක සඳහන් කර තිබෙනවා.
කෙසේ වෙතත්, මෙම යෝජනාවට විරුද්ධව 5,000කට වැඩි පිරිසක් පෙත්සමකට අත්සන් කර තිබෙනවා. ඒ අතර Wyndham හි පුස්තකාල සේවකයන් 100කට වැඩි පිරිසක්ද සිටින බවයි වාර්තා වන්නේ.
විරෝධතාකරුවන් පවසන්නේ කාර්ය මණ්ඩලය නොමැති පුස්තකාල විවෘත වේලාවන්, ජනතාවට අවශ්ය සැබෑ පුස්තකාල සේවාවන් ලබාදීමට ප්රමාණවත් නොවන බවයි.
පෙත්සම් සංවිධායක Emily Brown පවසන්නේ ජනතාවට අවශ්ය වන්නේ පුස්තකාල සේවකයන් සමඟ වැඩි විවෘත වේලාවන් මිස, සේවකයන් නොමැති ගොඩනැගිලි විවෘත කිරීමක් නොවන බවයි.
Wyndham පුස්තකාල සේවකයන් පවසන්නේ ඔවුන්ගේ රැකියාව පොත් රාක්කවලට පොත් තැබීම හෝ පොත් ලබාදීම පමණක් නොවන බවයි. විශේෂයෙන් නිවාස නොමැති පුද්ගලයන්ට සහ සමාජයේ අවදානමට ලක්ව සිටින ජනතාවට සහාය වීම, online forms පිරවීම, රජයේ සේවාවන් භාවිත කිරීම සහ තාක්ෂණික ගැටලු විසඳා ගැනීමට උපකාර කිරීමද ඔවුන්ගේ දෛනික කාර්යයන් අතරට ඇතුළත් බව ඔවුන් පෙන්වා දෙනවා.
එම නිසා, තාක්ෂණය භාවිත කර වියදම් අඩු කිරීමේ ප්රවණතාවය හමුවේ තම රැකියා අනාගතය පිළිබඳ දැඩි කනස්සල්ලක් ඇති බව Wyndham හි පුස්තකාල සේවකයන් පවසනවා.
