බ්‍රිස්බන්හි පැවැත්වෙන ජනප්‍රිය Ekka උත්සවයට සහභාගී වෙමින් සිටි One Nation පක්ෂයේ සේවිකාවකට පහරදීමේ සිද්ධියක් සම්බන්ධයෙන් පොලිස් පරීක්ෂණ ආරම්භ වී තිබෙනවා.

සිද්ධිය සිදුවී ඇත්තේ පසුගිය සිකුරාදා, අගෝස්තු 14 වැනිදා, Brisbane Showgrounds හි පැවති Ekka උත්සවයේදීයි. පක්ෂය පවසන්නේ හැට ගණන්වල පසුවන එම කාන්තාව One Nation කමිසයක් පැළඳ පක්ෂයේ කුටිය වෙත යමින් සිටියදී පුද්ගලයන් හතර දෙනෙකු ඇය වෙත පැමිණ ඇති බවයි.

One Nation ප්‍රකාශයන්ට අනුව, කාන්තාවට වාචිකව අපහාස කිරීමෙන් පසු ඇය වෙත කෙළ ගසා, පසුව පිරිමි පුද්ගලයෙකු ඇය අල්ලා කරකවා පහර දී තිබෙනවා. ප්‍රහාරයෙන් ඇගේ ඉළ ඇටයක් කැඩී ඇති අතර සිරුරේ විශාල තැලීම්ද සිදුව ඇති බව සඳහන්.

තුවාල හේතුවෙන් ඇය රෝහල්ගත කර ප්‍රතිකාර ලබා ඇති අතර, පසුව රෝහලෙන් පිටව ගොස් තිබෙනවා.

ක්වීන්ස්ලන්ත පොලීසිය මෙම සිද්ධිය පිළිබඳ දැනුවත්ව සිටින නමුත්, සඳුදා වන විට නිල පැමිණිල්ලක් ලැබී නොතිබූ බව සඳහන් කර තිබෙනවා. පොලිසිය සිද්ධිය සම්බන්ධයෙන් වැඩිදුර විමර්ශන සිදුකරමින් සිටින බවයි වාර්තා වන්නේ.

Ekka උත්සවය සංවිධානය කරන Royal National Agricultural and Industrial Association ආයතනයද සිද්ධිය සම්බන්ධයෙන් කනගාටුව පළ කර තිබෙන අතර, පොලිස් පරීක්ෂණ සඳහා සහාය ලබාදෙන බවද එම ආයතනය සඳහන් කර තිබෙනවා.

One Nation පක්ෂය මෙම ප්‍රහාරය දැඩි ලෙස හෙළා දැක ඇති අතර, දේශපාලන මතභේද කිසිවිටෙකත් ප්‍රචණ්ඩත්වයට හේතුවක් නොවිය යුතු බව පක්ෂ නියෝජිතයන් පවසනවා.

කෙසේ වෙතත්, ප්‍රහාරයට සම්බන්ධ පුද්ගලයන් පිළිබඳ චෝදනා මෙතෙක් තහවුරු වී නොමැති අතර, සිද්ධිය සම්බන්ධයෙන් පොලිස් පරීක්ෂණ තවදුරටත් ක්‍රියාත්මකයි.