ඔස්ට්‍රේලියානුවන්ගේ පාරිභෝගික විශ්වාසය මේ සතියේත් විශාල වෙනසක් නොපෙන්වා 75ක මට්ටමේ පවතින බව ANZ-Roy Morgan නවතම දත්ත පෙන්වා දෙනවා.

අගෝස්තු 4 සිට 10 දක්වා සිදුකළ සමීක්ෂණයට අනුව Consumer Confidence දර්ශකය පසුගිය සතියට සාපේක්ෂව ලකුණු 0.3කින් පමණක් ඉහළ ගොස් ඇති අතර, එය 2026 වසරේ සතිපතා සාමාන්‍යයට වඩා ලකුණු 3කින් ඉහළ මට්ටමක් වනවා.

කෙසේ වෙතත් පසුගිය වසරේ එම කාලයේ පැවති 89.3ක අගය සමඟ සසඳන විට මේ වසරේ Consumer Confidence ලකුණු 14.3කින් පහළ ගොස් තිබීම විශේෂ අවධානයට ලක්ව තිබෙනවා.

තම පවුල පසුගිය වසරට සාපේක්ෂව මූල්‍යමය වශයෙන් වඩා හොඳ තත්ත්වයක සිටින බව පවසන්නේ සියයට 16ක් පමණක් වන අතර, සියයට 51ක් තම පවුල මූල්‍යමය වශයෙන් වඩා නරක තත්ත්වයක සිටින බව පවසනවා.

එමෙන්ම ඉදිරි මාස 12 තුළ තම පවුලේ මූල්‍ය තත්ත්වය වඩා නරක අතට හැරෙනු ඇතැයි අපේක්ෂා කරන පිරිස සියයට 39ක් වන අතර, ප්‍රධාන ගෘහ භාණ්ඩ මිලදී ගැනීමට වර්තමානය හොඳ අවස්ථාවක් නොවන බව පවසන පිරිස සියයට 44ක් දක්වා ඉහළ ගොස් තිබෙනවා.

විශේෂයෙන්ම mortgage ගෙවන පවුල් අතර Consumer Confidence පහළ ගොස් ඇති අතර, ඉන්ධන මිල ඉහළ යාමත් පවුල්වල මූල්‍ය අපේක්ෂාවන්ට බලපා ඇති බව ANZ ආර්ථික විශ්ලේෂණයෙන් පෙන්වා දෙනවා.

ඒ අනුව පොලී අනුපාත, ජීවන වියදම සහ ඉන්ධන මිල වැනි කරුණු හමුවේ ඔස්ට්‍රේලියානු පවුල් තවමත් තම වියදම් සම්බන්ධයෙන් ප්‍රවේශම් සහගතව සිටින බව මෙම නවතම Consumer Confidence දත්තවලින් පැහැදිලි වනවා.