මෙල්බන්හි බටහිර ප්‍රදේශයේ සිසුන්ට නවීන තාක්ෂණික සහ STEM අධ්‍යාපනය ලබාගැනීමට අවස්ථාව සලසමින් නව Tech School එකක් විවෘත කර තිබෙනවා.

වික්ටෝරියා ප්‍රිමියර් බෙන් කැරොල් සහ අධ්‍යාපන අමාත්‍ය ගේබ්‍රියෙල් විලියම්ස් විසින් Brimbank Tech School නිල වශයෙන් විවෘත කරනු ලැබුවේ Victoria University හි Sunshine කැම්පස් පරිශ්‍රයේදීයි.

මෙම නව මධ්‍යස්ථානය හරහා ප්‍රදේශයේ පාසල් 15ක සිසුන් 13,000කට වැඩි පිරිසකට නොමිලේ ප්‍රායෝගික STEM අධ්‍යාපනය ලබාගැනීමට අවස්ථාව ලැබෙනවා.

සිසුන්ට පරිසර හිතකාමී ධාවන වාහන සහ ඩ්‍රෝන තාක්ෂණය පිළිබඳ අත්දැකීම් ලබාගැනීමටත්, කුඩා Cybersecurity Operations Centre එකක් සහ Smart Energy Micro-grid එකක් නිර්මාණය කිරීමටත් අවස්ථාව හිමිවනවා.

මෙහි වැඩසටහන් පිරිසිදු බලශක්තිය, උසස් නිෂ්පාදන තාක්ෂණය, සයිබර් ආරක්ෂාව සහ සෞඛ්‍ය තාක්ෂණය ඇතුළු අනාගත රැකියා ක්ෂේත්‍ර සමඟ සෘජුව සම්බන්ධ කර තිබෙනවා.

Brimbank Tech School එක වික්ටෝරියා ප්‍රාන්තය පුරා ඉදිකෙරෙන නව Tech Schools හයකින් තුන්වැන්න වන අතර, STEM අධ්‍යාපනය සඳහා වික්ටෝරියා රජය වෙන් කර ඇති ඩොලර් මිලියන 116ක ආයෝජනයේ කොටසක් ලෙස මෙය ඉදිකර තිබෙනවා.

නව Tech Schools හය හරහා ප්‍රාන්තය පුරා සිසුන් 62,000කට වැඩි පිරිසකට අනාගත රැකියා සඳහා අවශ්‍ය ප්‍රායෝගික තාක්ෂණික පුහුණුව නොමිලේ ලබාදීමට සැලසුම් කර තිබෙනවා.

වික්ටෝරියා රජය පවසන්නේ, සිසුන් ජීවත් වන ප්‍රදේශය හෝ postcode එක නොසලකා අනාගත රැකියා සඳහා අවශ්‍ය නවීන කුසලතා ලබාදීම මෙහි ප්‍රධාන අරමුණ බවයි.