Motor Neurone (MND) රෝගීන් වෙනුවෙන් අරමුදල් රැස්කිරීම සඳහා ඔස්ට්රේලියාව හරහා 5,300kmක පාපැදි සවාරියක් සාර්ථකව නිම කළ 82 හැවිරිදි Bob Montgomery, එම සංචාරය අවසන් කර පසුදිනම හදිසියේ අභාවප්රාප්ත වී තිබෙනවා.
සති 5ක කාලයක් තිස්සේ සිය 18 හැවිරිදි මුනුපුරා වන Tom Malcolm සමඟින් Broome නගරයේ සිට Bowral දක්වා ඔස්ට්රේලියානු මහද්වීපය හරහා ගිය මෙම අභියෝගාත්මක පාපැදි සංචාරය නම් කර තිබුණේ “Miles for MND: One Last Ride” යනුවෙන්.
සිය ආදරණීය ලේ නෑයෙකු Motor Neurone රෝගයෙන් මියයාම නිසා කම්පනයට පත්ව සිටි Montgomery, මෙම රෝගයෙන් පෙළෙන ජනතාවට සහන සැලසීම වෙනුවෙන් ඩොලර් ලක්ෂයකට අධික මුදලක් රැස්කර දීමට සමත් වුණා.
සංචාරය නිමා කර පසුදින සවස, තම බිරිඳ සමඟ නිවස බලා යමින් සිටියදී, ඔහු හදිසියේ රෝගාතුර වී තිබෙනවා.
ඒ සමඟම ඔවුන් ගමන් කළ රථය සිඩ්නිහි M5 East උමං මාර්ගයේ තාප්පයක ගැටී අනතුරට ලක්ව ඇති බවයි පොලිසිය වාර්තා කරන්නේ.
වහාම රෝහල් ගත කෙරුණු Bob Montgomery පසුව ජීවිතක්ෂයට පත්ව ඇති අතර අනතුරින් තුවාල ලැබූ ඔහුගේ බිරිඳ මේ වනවිට ස්ථාවර තත්ත්වයෙන් පසුවනවා.
