ඔස්ට්රේලියාවේ තරුණ පරපුර මුහුණ දෙන බරපතල ගැටලුවක් බවට පත්ව ඇති නිවාස අර්බුදය සහ පරම්පරා අතර පවතින අසමාන ධන ව්යාප්තිය පිළිබඳව සෙනෙට් කමිටු විමර්ශන මාලාවකදී ආන්දෝලනාත්මක තොරතුරු රැසක් අනාවරණය වී තිබෙනවා.
ඔස්ට්රේලියානු සමාජ සේවා කවුන්සිලය (ACOSS) පෙන්වා දෙන්නේ නිවාස අර්බුදය දෙස වයස් පරතරය මත පමණක් බලා තීරණ ගැනීම ප්රමාණවත් නොවන බවයි.
වර්තමානය වන විට රටේ පවතින සමස්ත ධනයෙන් වයස අවුරුදු 35ට අඩු තරුණ ප්රජාව සතු වන්නේ 7%ක වැනි ඉතා සුළු ප්රතිශතයක් පමණක් බව එහිදී හෙළි වුණා.
සෙනෙට් කමිටුව හමුවේ අදහස් දැක්වූ සිඩ්නි විශ්වවිද්යාලයේ පර්යේෂකයෙකු වන Martin Duck ප්රකාශ කළේ, වර්තමාන ඔස්ට්රේලියානු තරුණයින්ට තමන් උපයන මුදලින් පමණක් නිවසක් මිලදී ගැනීම සිහිනයක් වී ඇති බවයි.
වර්තමානයේ නිවාස හිමිකාරිත්වය ලබන තරුණයින් බහුතරයක් එය ලබා ගන්නේ තම මව්පියන් සතු ධනය (Bank of Mum and Dad) උපයෝගී කරගනිමින් බවයි දත්ත මඟින් පෙන්වා දෙන්නේ.
ඉදිරි වසර 20 තුළ ධනවත් වැඩිහිටි පරම්පරාවෙන් ඩොලර් ට්රිලියන 5කට අධික දේපල ප්රමාණයක් කිසිදු බදු අය කිරීමකින් තොරව ඔවුන්ගේ දරුවන්ට උරුම වීමට නියමිත අතර, මේ හේතුවෙන් ධනවත් සහ දුප්පත් පවුල් අතර පරතරය තවදුරටත් දරුණු වනු ඇති බවට ද අනතුරු අඟවා තිබෙනවා.
වික්ටෝරියා සහ ACT ප්රාන්ත හැර අනෙක් කිසිදු ප්රාන්තයක් කුලී නිවාස සඳහා අවම බලශක්ති කාර්යක්ෂමතා ප්රමිතීන් හඳුන්වා දී නොමැති බව ද මෙහිදී අනාවරණය වුණා.
මෙම ගැටලුවලට විසඳුම් සෙවීම සඳහා වන සෙනෙට් කමිටු විමර්ශනයේ මීළඟ අදියර ලබන බ්රහස්පතින්දා පැවැත්වීමට නියමිතයි.
