ඇමෙරිකාවේ ගුවන් ගමන් පාලන පද්ධතියේ එක් Router උපකරණයක ඇති වූ තාක්ෂණික දෝෂයක් හේතුවෙන් ගුවන් ගමන් 15,000කට අධික සංඛ්‍යාවක් අවලංගු කිරීමට හෝ ප්‍රමාද කිරීමට සිදුව ඇති බව වාර්තා වනවා.

මෙම දැවැන්ත බිඳවැටීම හේතුවෙන් ලොව පුරා ගුවන් මගීන් මිලියන 1.5ක් පමණ පීඩාවට පත්ව ඇති අතර, එය 2001 සැප්තැම්බර් 11 ප්‍රහාරයෙන් පසු ඇමෙරිකාවේ සිදුවූ දීර්ඝතම ජාතික මට්ටමේ ගුවන් ගමන් අත්හිටුවීම ලෙස සැලකෙනවා.

ඇමෙරිකානු ප්‍රවාහන ලේකම් Sean Duffy පවසන්නේ පැරණි Copper රැහැන් Fibre Optic තාක්ෂණයට මාරු කිරීමේ නඩත්තු කටයුත්තක් අතරතුර මෙම දෝෂය හටගෙන ඇති බවයි.

අදාළ Router උපකරණය තත්පර කිහිපයකට වරක් සම්බන්ධතා ඉල්ලීම් දහසකට අධික සංඛ්‍යාවක් අනෙකුත් උපකරණ වෙත යොමු කිරීම නිසා මුළු පද්ධතියම අඩපණ වී තිබෙනවා.

මෙය Cyber Attack එකක් හෝ AI තාක්ෂණය හේතුවෙන් සිදුවූවක් නොවන බව බලධාරීන් තහවුරු කර ඇති අතර, මගීන්ගේ ආරක්ෂාව වෙනුවෙන් පැය හතරක පමණ කාලයක් ගුවන් ගමන් අත්හිටුවීමට පියවර ගෙන තිබෙනවා.

මෙම බිඳවැටීමෙන් ඇමෙරිකාවට අමතරව බ්‍රිතාන්‍යය ඇතුළු රටවල් රැසක ගුවන් ගමන්වලට ද බලපෑම් එල්ල වී ඇති නමුත්, ඔස්ට්‍රේලියාවේ බලපෑමට ලක්ව ඇත්තේ Qantas ගුවන් ගමනක් පමණක් බව වාර්තා වනවා.

ඇමෙරිකාවේ පැරණි ගුවන් ගමන් පාලන පද්ධතිය නවීකරණය කිරීම සඳහා දැනටමත් ඩොලර් බිලියන ගණනක් වෙන්කර ඇති අතර, ඉදිරියේදී මෙවැනි බිඳවැටීම් යළි සිදුවිය හැකි බවට ද ප්‍රවාහන ලේකම්වරයා අනතුරු අඟවා තිබෙනවා.