2018 වසරේදී ඔස්ට්‍රේලියානු ක්‍රිකට් ක්‍රීඩාව දැඩි අර්බුදයකට ඇද දැමූ පන්දුව පළුදු කිරීමේ සිද්ධිය සම්බන්ධයෙන් හිටපු ඔස්ට්‍රේලියානු ක්‍රිකට් ක්‍රීඩක David Warner අලුත්ම බරපතළ චෝදනාවක් එල්ල කර තිබෙනවා.

එම සිද්ධිය පිළිබඳ Cricket Australia ආයතනය සිදුකළ විමර්ශනයේදී Josh Hazlewood, Mitchell Starc සහ Nathan Lyon යන ප්‍රධාන පන්දු යවන්නන් තිදෙනාගෙන් ප්‍රශ්න කර නොමැති බව තමන් දන්නා තරමින් පැවසිය හැකි යැයි Warner සිය Instagram ගිණුමේ සඳහන් කර තිබෙනවා.

එසේ නම් එම ක්‍රීඩකයන් පන්දුව පළුදු කිරීමේ සැලසුම පිළිබඳ කිසිවක් නොදැන සිටි බව Cricket Australia ආයතනය ප්‍රකාශ කරන්නේ කෙසේදැයි ඔහු ප්‍රශ්න කරනවා.

විමර්ශනය ආරම්භයේදීම වරද පැටවිය යුතු පුද්ගලයන් තීරණය කර, සත්‍යය වසන් කිරීමට උත්සාහ කර ඇති බවට සැකයක් මතුවන බවට ද Warner චෝදනා කර තිබෙනවා.

2018 වසරේ දකුණු අප්‍රිකාවේ Cape Town නුවර පැවති ටෙස්ට් තරගයකදී පන්දුව පළුදු කිරීමේ සිද්ධිය හේතුවෙන් එවකට නායක Steve Smith සහ උපනායක David Warner වසරක තරග තහනමකට ලක්වූ අතර Cameron Bancroftට මාස නවයක තහනමක් පැනවුණා.

මේ අතර Usman Khawaja සිය Sabr කෘතියෙන් ප්‍රකාශ කර ඇත්තේ මෙම සිද්ධිය සම්බන්ධයෙන් කණ්ඩායමේ සාමූහික වගකීම පිළිබඳ සාකච්ඡාවක් අවශ්‍ය වූ නමුත් තමන්ගෙන් ද විමර්ශකයන් ප්‍රශ්න නොකළ බවයි.

කෙසේ වෙතත්, වත්මන් ඕස්ට්‍රේලියානු ටෙස්ට් නායක Pat Cummins එම සිද්ධියේදී Sandpaper ක්‍රීඩාංගණයට රැගෙන යන බව තමන් නොදැන සිටි බව අවධාරණය කරමින් Khawajaගේ ප්‍රකාශ ප්‍රතික්ෂේප කර තිබෙනවා.

එවකට ඔස්ට්‍රේලියානු ක්‍රිකට් කණ්ඩායමේ සංස්කෘතිය පිළිබඳ ස්වාධීන විමර්ශනයක් සිදුකළ ආචාර්ය Simon Longstaff ද පවසා ඇත්තේ දඬුවම් ලැබූ ක්‍රීඩකයන් තිදෙනාට අමතරව තවත් පුද්ගලයන් මෙම සිද්ධිය පිළිබඳ දැන සිටි බවට තොරතුරු අසන්නට ලැබුණු නමුත් ඒවා තහවුරු කිරීමට ප්‍රමාණවත් සාක්ෂි නොතිබූ බවයි.

වසර අටකට පසුව නැවත කරළියට පැමිණ ඇති මෙම ආන්දෝලනය හමුවේ, 2018 Sandpaper සිද්ධිය පිළිබඳ සම්පූර්ණ සත්‍යය මෙතෙක් අනාවරණය වී තිබේද යන්න පිළිබඳ යළිත් ප්‍රශ්න මතුව තිබෙනවා.

කෙසේ වෙතත්, Warner එල්ල කරන සත්‍යය වසන් කිරීමේ චෝදනාව මෙතෙක් තහවුරු වී නොමැති අතර Cricket Australia ආයතනය පවසන්නේ මුල් විමර්ශනයේදී සියලුම ක්‍රීඩකයන්ට අදහස් දැක්වීමට අවස්ථාව ලබාදී තිබූ බවයි.