ඔස්ට්‍රේලියාවේ නිවසක් මිලදී ගැනීම බොහෝ තරුණයන්ට අභියෝගයක් වී ඇති පසුබිමක, රජය හඳුන්වාදී ඇති First Home Super Saver (FHSS) යෝජනා ක්‍රමය භාවිත කරමින් සිය පළමු නිවස මිලදී ගැනීමට 30 හැවිරිදි තරුණයෙකු සමත්ව තිබෙනවා.

New South Wales ප්‍රාන්තයේ Orange ප්‍රදේශයේ පදිංචි Damien Little වසර 8ක් පුරා සිය ආදායමෙන් කොටසක් Superannuation ගිණුමකට ස්වේච්ඡාවෙන් තැන්පත් කරමින් මෙම ඉලක්කය සපුරාගෙන තිබෙනවා.

ඔහු උසස් පාසල් අධ්‍යාපනය අවසන් කළ පසු coffee shops සහ restaurantsවල රැකියා කරමින් සිය ආදායමෙන් ඇතැම් අවස්ථාවල 25%ක් දක්වා ඉතිරි කර ඇති අතර, සතියකට ඩොලර් 50ත් 100ත් අතර මුදල් ද තැන්පත් කර තිබෙනවා.

2017 වසරේදී FHSS යෝජනා ක්‍රමය පිළිබඳ දැනගත් ඔහු, එම ක්‍රමය භාවිතයෙන් වසර ගණනාවක් මුදල් ඉතිරි කර 2025 නොවැම්බර් මාසයේදී සිය පළමු නිවස මිලදීගෙන තිබෙනවා.

FHSS ක්‍රමය යටතේ එක් මූල්‍ය වර්ෂයකදී ඩොලර් 15,000ක් දක්වාත්, සමස්තයක් ලෙස ඩොලර් 50,000ක් දක්වාත් සුදුසුකම් ලබන ස්වේච්ඡා Superannuation දායකත්වයන් පළමු නිවස සඳහා යොදාගැනීමට අවස්ථාව පවතිනවා.

ඊට අමතරව Australian Taxation Office විසින් ගණනය කරන අදාළ ආදායම් ප්‍රමාණයක් ද ලබාගත හැකි අතර, මෙම ක්‍රමය හරහා සාමාන්‍ය ඉතිරිකිරීම්වලට වඩා බදු වාසි ලබාගැනීමේ හැකියාවක් පවතිනවා.

Damien Little සිය Superannuation ගිණුමේ ඉතිරිකිරීම් වර්ධනය කරගනිමින් ඩොලර් 65,000කට ආසන්න ශේෂයක් ගොඩනඟාගෙන තිබූ බව වාර්තා වනවා.

කෙසේ වෙතත්, Superannuation ගිණුමේ සම්පූර්ණ ශේෂයම FHSS යටතේ ලබාගත නොහැකි අතර, ඒ සඳහා වෙනම සුදුසුකම් සහ සීමාවන් ක්‍රියාත්මක වනවා.

මේ අතර ATO මඟින් මුදල් නිදහස් කිරීමේ ක්‍රියාවලිය ප්‍රමාද වීම හේතුවෙන් ඔහුගේ නිවස මිලදී ගැනීමේ අවසන් ගෙවීම පවා ප්‍රමාද කිරීමට සිදුවී තිබෙනවා.

FHSS ක්‍රමය භාවිත කරන පුද්ගලයන්ට සාමාන්‍යයෙන් මුදල් නිදහස් කිරීම ඉල්ලා සිටි දිනයේ සිට මාස 12ක් ඇතුළත සුදුසුකම් ලබන නිවසක් මිලදී ගැනීමේ හෝ ඉදිකිරීමේ ගිවිසුමකට එළඹිය යුතු අතර, ATO මඟින් තවත් මාස 12ක කාලයක් ලබාදිය හැකියි.

එමෙන්ම මිලදී ගන්නා නිවසේ පදිංචි වීමට අදාළ කොන්දේසි ද සපුරාලිය යුතු වනවා.