ඔස්ට්‍රේලියානු පාරිභෝගිකයන්ගේ ආර්ථික විශ්වාසය දිගුකාලීන ව සාමාන්‍ය මට්ටමට වඩා පහළින් පවතින බව නවතම Caveat Indices සමීක්ෂණ වාර්තාවකින් අනාවරණය වී තිබෙනවා.

අද (නොවැම්බර් 14) යාවත්කාලීන කර ඇති එම වාර්තාවට අනුව, 2026 ඔක්තෝබර් මාසයේ Consumer Confidence දර්ශකය, ඒකක 98ක් දක්වා පහළ ගොස් තිබෙනවා. එහි සාමාන්‍ය අගය ඒකක 100ක් වන බැවින්, පාරිභෝගිකයන්ගේ ආර්ථිකය පිළිබඳ විශ්වාසය සාමාන්‍ය මට්ටමට වඩා අඩු වී ඇති බවයි පෙනී යන්නේ.

එනම්, මෙම දර්ශකය පෙර මාසයට සාපේක්ෂව ඒකක 0.3කින් පහළ ගොස් තිබෙනවා.

මේ අතර ඔස්ට්‍රේලියාවේ වාර්ෂික උද්ධමනය සියයට 4.3ක් ලෙසත්, විරැකියා අනුපාතය සියයට 4.72ක් ලෙසත්, වාර්ෂික නිවාස කුලී ඉහළ යාම සියයට 3.6ක් ලෙසත් වාර්තා වෙනවා.

නිවාස ණය ගෙවීම් සඳහා පවුල් ආදායමෙන් වැයවන ප්‍රමාණය සියයට 9.7ක් දක්වා ඉහළ ගොස් ඇති අතර, එය පසුගිය වසර දහයේ සාමාන්‍ය අගය වන සියයට 8.28ට වඩා වැඩි අගයක් ලෙසයි සටහන් වී ඇත්තේ.

ජීවන වියදම්, නිවාස ණය සහ කුලී ගාස්තු ඇතුළු ආර්ථික පීඩන දර්ශක පහම සාමාන්‍ය මට්ටමට වඩා අහිතකර තත්ත්වයක පැවතීම පාරිභෝගික විශ්වාසය දුර්වල වීමට බලපා ඇති පසුබිමක් වී ඇති බවයි Caveat Indices විශ්ලේෂණය වැඩිදුරටත් පෙන්වා දෙන්නේ.