ඔස්ට්‍රේලියාවේ ජාත්‍යන්තර සිසුන් අතර ජනප්‍රිය Graduate Diploma of Management (Learning) හෙවත් BSB80120 පාඨමාලාව අවලංගු කිරීමත් සමඟ, ඊට බලපෑමට ලක්වූ සිසුන්ට නව වීසා සහනයක් ලබාගැනීමේ අවස්ථාවක් උදා වී තිබෙනවා.

2026 ඔක්තෝබර් 5 වැනිදා සිට නව ජාත්‍යන්තර සිසුන්ට මෙම පාඨමාලාවට ඇතුළත් වීමට හෝ අධ්‍යයන කටයුතු ආරම්භ කිරීමට අවසර හිමිවන්නේ නැහැ.

එදිනට පෙර පාඨමාලාව ආරම්භ කර නොතිබූ සිසුන්ගේ Confirmation of Enrolment හෙවත් CoE අවලංගු කර ඇති අතර, ඊට පෙර පාඨමාලාව ආරම්භ කළ සිසුන්ට එය සම්පූර්ණ කිරීමට අවසර හිමිවනවා.

කෙසේ වෙතත්, මෙම පාඨමාලාව අවලංගු කිරීම අදාළ නීති යටතේ Provider Default තත්ත්වයක් ලෙස සැලකිය හැකි බැවින්, සුදුසුකම් ලබන සිසුන්ට ඔස්ට්‍රේලියාව තුළ රැඳී සිටිමින් නව Subclass 500 Student Visa බලපත්‍රයක් සඳහා අයදුම් කිරීමට අවස්ථාව සැලසෙනවා.

ඒ සඳහා අදාළ සිසුන් පාඨමාලාව අවලංගු වූ දිනයේ එහි ලියාපදිංචි වී සිටීමත්, වත්මන් Student Visa බලපත්‍රයක් තිබීම හෝ අවසන් වරට ලබාගෙන තිබූ Substantive Visa බලපත්‍රය Student Visa එකක් වීමත් ඇතුළු කොන්දේසි සපුරාලිය යුතුයි.

එමෙන්ම, වෙනත් Registered Course එකක් හැදෑරීම සඳහා නව වීසා බලපත්‍රයක් අවශ්‍ය විය යුතු අතර, අයදුම්පත 2026 ඔක්තෝබර් 5 වැනිදා සිට මාස 12ක් ඇතුළත ඉදිරිපත් කළ යුතු වනවා.

සුදුසුකම් ලබන ඇතැම් සිසුන්ට Visa Application Charge ගාස්තුවෙන් සම්පූර්ණ නිදහසක් ද හිමිවිය හැකි නමුත්, මෙම සහනය සියලුම සිසුන්ට ස්වයංක්‍රීයව හිමි නොවන බැවින් අධ්‍යාපන ආයතනයෙන් සහ Registered Migration Agent කෙනෙකුගෙන් උපදෙස් ලබාගන්නා ලෙස දැනුම් දී තිබෙනවා.