ඔස්ට්රේලියාව තුළ දැනට ක්රියාත්මක වන ළමා ආධාර ලබාදීමේ ක්රමවේදය හරහා, වෙන්වූ හිටපු සහකරුවන් විසින් තනි මවුවරුන්ව මූල්යමය වශයෙන් අපයෝජනය කිරීමට (Financial Abuse) සහ පාලනය කිරීමට මඟ පාදා ඇති බවට චෝදනා එල්ල වනවා.
රජයේ Services Australia ආයතනය හරහා ආධාර මුදල් ලබාගන්නවා වෙනුවට, දෙමාපියන් දෙදෙනා අතර පෞද්ගලිකව මුදල් හුවමාරු කරගන්නා Private Collect ක්රමවේදය සඳහා බොහෝ මවුවරුන් හිටපු සහකරුවන් විසින් තර්ජනය කර කැමති කරවා ගන්නා බවයි අනාවරණය වන්නේ.
ළමා ආධාර ඉල්ලා සිටියහොත් දරුවාගේ අයිතිය ලබාගැනීමට නඩු දමන බවට කෙරෙන තර්ජන හමුවේ, බොහෝ මවුවරුන් මෙම ආධාර ඉල්ලීමෙන් වළකින බව ද සඳහන්.
මේ අතර හිටපු සහකරුවන් තමන්ගේ සැබෑ ආදායම් වාර්තා සඟවමින් ළමා ආධාර ගෙවීම පැහැර හරින අතර, රජය විසින් මවට අදාළ ආධාර මුදල ලැබී ඇතැයි අනුමාන කරමින් බදු සහන කපා හැරීම නිසා බොහෝ තනි මවුවරුන් දැඩි අසරණභාවයකට පත්ව තිබෙනවා.
රජයේ සමීක්ෂණ වාර්තාවලට අනුව Private Collect ක්රමය යටතේ සිටින පවුල්වලින් අඩකට ආසන්න ප්රමාණයකට නියමිත පරිදි මුදල් නොලැබෙන අතර, ඔස්ට්රේලියාව පුරා ගෙවා නොමැති ළමා ආධාර මුදල ඩොලර් බිලියන 1.9කට අධිකයි.
මෙම තත්ත්වය වෙනස් කිරීම සඳහා ලබන වසරේ සිට ඩොලර් 10,000කට වඩා ළමා ආධාර ණය ඇති පුද්ගලයින්ට විදේශගත වීම තහනම් කිරීමේ නව නීති හඳුන්වා දීමට රජය පියවර ගනිමින් සිටින නමුත්, මෙම පද්ධතිය මුළුමනින්ම ප්රතිසංස්කරණය කළ යුතු බවයි ස්වාධීන පාර්ලිමේන්තු මන්ත්රීවරියන් පෙන්වා දෙන්නේ.
