ඔස්ට්රේලියාවේ වයස අවුරුදු 65න් ඉහළ ජ්යෙෂ්ඨ පුරවැසියන් සඳහා පෞද්ගලික සෞඛ්ය රක්ෂණ ගාස්තු වෙනුවෙන් මෙතෙක් ලබාදුන් වැඩිහිටි සහන අහෝසි කිරීමට ෆෙඩරල් ලේබර් රජය ගෙන ඇති තීරණයත් සමඟ දේශපාලන ක්ෂේත්රයේ දැඩි උණුසුම් තත්ත්වයක් හටගෙන තිබෙනවා.
නවතම අයවැය යෝජනා යටතේ ක්රියාත්මක කිරීමට නියමිත මෙම සංශෝධනය හේතුවෙන්, වසරකට ඩොලර් 6,000 ක රක්ෂණ වාරිකයක් ගෙවන අවුරුදු 65 ත් 69 ත් අතර ජ්යෙෂ්ඨයින්ට වසරකට ඩොලර් 250 ක පමණ මුදලක් අහිමි වන අතර, වයස අවුරුදු 70 න් ඉහළ පුද්ගලයින්ට අහිමි වන සහන මුදල ඩොලර් 500 ක් පමණ වනවා.
මෙම තීරණය සම්බන්ධයෙන් දැඩි විවේචනයක් එල්ල කරන නියෝජ්ය විපක්ෂ නායිකා Jane Hume සඳහන් කරන්නේ, මෙය නිශ්චිත ආදායම් ලබන විශ්රාමිකයන් මත පැටවූ ‘සූක්ෂම සහ අසාධාරණ බද්දක්’ බවයි.
එමෙන්ම මෙම සහන කැපීම හේතුවෙන් ජ්යෙෂ්ඨ රෝගීන් පෞද්ගලික රක්ෂණ අතහැර දැමුවහොත්, රජයේ නොමිලේ සෞඛ්ය සේවා සපයන රෝහල් පද්ධතිය තුළ විශාල තදබදයක් සහ දිගු පෝලිම් ඇති වන බවට New South Wales, Queensland සහ Tasmania යන ප්රාන්ත රජයන් ද රජයට අනතුරු අඟවා සිටිනවා.
කෙසේ වෙතත්, සෞඛ්ය අමාත්ය Mark Butler ප්රකාශ කළේ, මෙම තීරණය හරහා ඉතිරි කරගන්නා සෑම ඩොලරයක්ම ජ්යෙෂ්ඨ ප්රජාවගේ වැඩිහිටි රැකවරණ (Aged Care) සහ රෝහල් ඇඳන් පහසුකම් නැංවීම වෙනුවෙන් යොදවන බවයි.
එමෙන්ම එකම ආදායම් මට්ටමේ පසුවන ඕනෑම වයස් කාණ්ඩයක පවුලකට සමාන රජයේ සහනයක් හිමිවීම සාධාරණ බවත්, මෙම වෙනස නිසා පෞද්ගලික රක්ෂණ අත්හරිනු ඇත්තේ 40,000 ක් වැනි සුළු පිරිසක් පමණක් බවත් අමාත්යවරයා වැඩිදුරටත් අවධාරණය කළා.
