ඔස්ට්රේලියානු විශ්වවිද්යාලවල යුදෙව් විරෝධී ක්රියාකාරකම් සම්බන්ධයෙන් විමර්ශනය කරන Royal Commission on Antisemitism and Social Cohesion හමුවේ යුදෙව් සිසුන් සහ ආචාර්යවරුන් කිහිපදෙනෙකු තමන් මුහුණ දුන් අත්දැකීම් පිළිබඳ සාක්ෂි ලබාදී තිබෙනවා.
Australian National University හි ඉගෙනුම ලබන යුදෙව් සිසුවියක්, “Liat” යන ව්යාජ නාමයෙන් සාක්ෂි දෙමින් පැවසුවේ, 2023 ඔක්තෝබර් 7 හමාස් ප්රහාරයෙන් පසු විශ්ව විද්යාල පරිසරය වෙනස් වූ අතර තමන්ට “Baby Killer” සහ “Genocide Supporter” ලෙස අපහාස කළ බවයි.
ඇය වැඩිදුරටත් සඳහන් කළේ, පලස්තීන හිතවාදී විරෝධතා අතරතුර යුදෙව් බව සඟවාගෙන විශ්වවිද්යාලයට යාමට සිදු වූ බවත්, මිතුරන් කිහිපදෙනෙකුද තමන් සමඟ සබඳතා නතර කළ බවයි.
එමෙන්ම University of New South Wales හි හිටපු ආචාර්යවරයෙකුද සාක්ෂි දෙමින් පැවසුවේ, දේශනයක් අතරතුර සිසුන් සිව්දෙනෙකු තමන්ට නාසි ආචාරය (Nazi Salute) පෙන්වූ බවත්, ඒ සම්බන්ධයෙන් විශ්වවිද්යාලය ප්රමාණවත් ක්රියාමාර්ග නොගත් බවයි.
University of Sydney හි හිටපු ආචාර්යවරියක්ද කියා සිටියේ, යුදෙව් සිසුන්ගේ සහ සේවකයන්ගේ ආරක්ෂාව පිළිබඳ පැමිණිලිවලට විශ්වවිද්යාලයේ ප්රතිචාරය ප්රමාද වූ බවත්, පැමිණිලි ක්රියාවලියද ඉතා අපහසු වූ බවයි.
කොමිසම හමුවේ ඉදිරිපත් වූ සාක්ෂිවලට අනුව, මැද පෙරදිග ගැටුමෙන් පසු ඇතැම් විශ්වවිද්යාලවල පැවති පලස්තීන හිතවාදී විරෝධතා හේතුවෙන් යුදෙව් සිසුන් සහ කාර්ය මණ්ඩලය අතර අනාරක්ෂිත හැඟීම් වර්ධනය වී ඇති බවද අවධාරණය කෙරුණා.
මෙම රාජකීය කොමිසම ඉදිරි දිනවලදී විශ්වවිද්යාලවල ප්රතිචාර, වෛරී ක්රියා වැළැක්වීම සඳහා ගත යුතු පියවර සහ ෆෙඩරල් රජය හඳුන්වාදීමට යන නව නීතිමය ප්රමිතීන් පිළිබඳවද වැඩිදුර සාක්ෂි විමර්ශනය කිරීමට නියමිතයි.
