2026 අගෝස්තු 2 වැනිදා සිට කොළඹ සහ මෙල්බන් අතර සතියකට ක්රියාත්මක වන ගුවන් වාර සංඛ්යාව 7 සිට 10 දක්වා ඉහළ නංවන බව ශ්රීලංකන් ගුවන් සේවය මීට පෙර නිවේදනය කර තිබුණා.
පසුගියදා ඕස්ට්රේලියාවේ සංචාරයක නිරත වූ ශ්රී ලංකා විදේශ කටයුතු, විදේශ රැකියා සහ සංචාරක අමාත්ය විජිත හේරත්, ශ්රී ලංකාව සහ ඕස්ට්රේලියාව අතර ගුවන් සම්බන්ධතා තවදුරටත් පුළුල් වන බවයි ප්රකාශ කර සිටියේ.
කෙසේ වෙතත්, අගෝස්තු මාසයේ සිට නොවැම්බර් මුල් සතිය දක්වා ක්රියාත්මක වීමට නියමිතව තිබූ එම අමතර ගුවන් වාර නොවැම්බර් මස දක්වා අවලංගු කර ඇති බවට, අදාළ ගුවන් ටිකට්පත් මිලදී ගත් මගීන් සහ ඔස්ට්රේලියාවේ සංචාරක නියෝජිතයන් කිහිපදෙනෙකු AusLanka TV වෙත තොරතුරු ලබාදී තිබෙනවා.
අවලංගු කිරීම් පිළිබඳ දැනුම්දීම් ලැබුණු ඇතැම් මගීන්ට වෙනත් ගුවන් දිනයක් ලබාගැනීම හෝ මුදල් ආපසු ඉල්ලා සිටීමේ විකල්ප ලබාදී ඇති බවද වාර්තා වනවා.
එහෙත් මුදල් ආපසු ලබාගැනීම සඳහා මාස කිහිපයක් ගතවිය හැකි බවට දැනුම් දී ඇති බවයි ඇතැම් මගීන් පවසන්නේ.
මෙම තත්ත්වය හේතුවෙන් මෙල්බන් සහ සිඩ්නි වැනි ප්රධාන නගරවලින් පිටත ජීවත්වන මගීන්ට තවත් ගැටලුවක් මතුව තිබෙනවා.
ටස්මේනියාව, ඇඩිලේඩ් සහ ඔස්ට්රේලියාවේ වෙනත් ප්රාදේශීය නගරවල සිට මෙල්බන් දක්වා වෙනම දේශීය ගුවන් ටිකට්පත් මිලදී ගත් අයට, ජාත්යන්තර ගුවන් වාරය අවලංගු වුවහොත් එම දේශීය ටිකට්පත්වල මුදල් අහිමිවීමේ අවදානමක් පවතිනවා.
ජාත්යන්තර සහ දේශීය ගුවන් ගමන් එකම booking එකකින් මිලදී ගෙන තිබේ නම් නැවත වෙන්කර දීමක් සිදුවිය හැකි නමුත්, වෙන වෙනම ටිකට්පත් මිලදී ගෙන තිබේ නම් ඒ සඳහා වන්දි හෝ මුදල් ආපසු ලබාදීම අදාළ ගුවන් සේවයේ සහ ටිකට්පතේ කොන්දේසි මත රඳා පවතිනවා.
ඔස්ට්රේලියා පාරිභෝගික කොමිසම (ACCC) පවසන්නේ ගුවන් ගමනක් අවලංගු වූ විට මගියාට වෙනත් ගුවන් ගමනක්, මුදල් ආපසු ලබාදීමක් හෝ ඇතැම් අවස්ථාවල වෙනත් ගුවන් සේවයකින් ගමන් කිරීමේ වියදම ආපසු ලබාගැනීමේ අයිතිය තිබිය හැකි නමුත්, එක් එක් සිද්ධිය booking කොන්දේසි සහ අවලංගු කිරීමට හේතුව අනුව සලකා බැලිය යුතු බවයි.
කෙසේ වෙතත්, මෙම අවලංගු කිරීම් පිළිබඳ සම්පූර්ණ නිල නිවේදනයක් ප්රසිද්ධියේ තවම හමු නොවූ බැවින්, අගෝස්තු සිට නොවැම්බර් දක්වා ශ්රීලංකන් ගුවන් සේවයෙන් ගමන් කිරීමට නියමිත මගීන් තම booking reference එක භාවිත කර ගුවන් ගමනේ තත්ත්වය වහාම පරීක්ෂා කරන ලෙස උපදෙස් දෙනවා.
